“O‘zsanoatqurilishmateriallari” uyushmasi tomonidan xorijiy davlatlarda savdo uyi va omborlari ochilmoqda

Hozirda mamlakatimizda qurilish materiallari ishlab chiqaruvchi korxonalar soni 10 mingdan ortiqni tashkil etadi. Ilm-fan yutuqlaridan oqilona foydalanish natijasida qurilish materiallari turi 100 taga yetkazildi.

2024 yilda 42 trln so‘mlik qurilish materiallari ishlab chiqarildi. Belgilangan reja 116 foizga bajarildi. Sohaning mamlakat sanoatidagi ulushi 4,8 foizni tashkil etdi.

Jumladan, 44 mln kv m - qurilish oynasi, 90 mln kv m - gipsokarton, 17,8 mln tn - sement, 52 mln kv m - keramik plitka, 365 ming tonna - quruq qurilish aralashmasi, 6 ming tonna - gulqog‘oz kabi qurilish materiallari ishlab chiqarildi.

O‘tgan yilda sohada jami 2,2 mlrd dollarlik investisiyalar, shundan 1,4 mlrd dollarlik xorijiy investisiya va kreditlar o‘zlashtirilgan

Sohada 2024 yilda 831 mln. dollar eksport amalga oshirildi. Eksport qilingan mahsulotlarning 26,2 foizi metall buyumlar, 8,7 foizi keramika mahsulotlar, 15,1 foizi PVX profil, truba va plastmassa mahsulotlar, 6,6 foizi quruq qurilish qorishmalari kabi mahsulotlar ulushiga to‘g‘ri keldi. E’tiborlisi, 2024 yilda eksport qilingan qurilish materiallari turlari 55 dan 65 ga oshirishga erishildi. O‘tgan yilda eksportyor korxonalar 1450 taga yetkazildi. Shuningdek, eksport geografiyasi 56 davlatdan 60 taga yetkazildi.

Davlatlar kesimida tahlil qilinganda eksport qilingan mahsulotlarning 22,6 % - Qozog‘iston hissasiga, 12,4 % - Qirg‘izistonga, 13,9 % - Tojikistonga, 24,5 % - Rossiya Federasiyasiga, 2,5 % - Turkmanistonga, 1,6 % - Litvaga va 0,9 % - Xitoy davlatlariga to‘g‘ri kelgan.

Shu bilan birga, Kipr, Malayziya, Avstraliya, Serbiya va boshqa shu kabi davlatlarning bozorlarini o‘zlashtirilishi hisobiga mahsulotlar eksport geografiyasi kengaytirildi. O‘tgan yilning o‘zida qo‘shimcha 10 tadan ortiq yangi mahsulotlar eksport qilindi.

Qurilish materiallari eksportini yanada oshirish, yangi bozorlarni o‘zlashtirish maqsadida “O‘zsanoatqurilishmateriallari” uyushmasi tomonidan xorijiy davlatlarda savdo uyi va omborlari ochilmoqda. Xususan, Ozarbayjon, Afg‘oniston va Tojikiston davlatlarida qurilish materiallari savdosiga ixtisoslashgan “O‘zbekiston savdo uyi” faoliyati yo‘lga qo‘yilgan.

O‘zbekiston Respublikasi Prezidentining “Respublikada ishlab chiqarishni rivojlantirish va sanoat kooperasiyasini kengaytirishning samarali tizimini yaratish chora-tadbirlari to‘g‘risida” 2022 yil 24 yanvardagi PQ-99-son qaroriga asosan 2024 yilda mahalliylashtirish dasturi doirasida jami 3,5 trln so‘mlik mahsulotlar ishlab chiqarilib, belgilangan rejani 104,5 foizga bajarilishi ta’minlandi.

Endi joriy yilda amalga oshiriladigan ustuvor vazifalarga to‘xtalib o‘tsak, qurilish materiallari sohasida 2025 yilda ishlab chiqarish hajmi 50 trln. so‘mga yetkaziladi. 1,2 mlrd. dollar eksport amalga oshirilish rejalashtirilgan. Mahalliylashtirish dasturi doirasida 4,4 trln. so‘mlik mahsulotlar ishlab chiqariladi.

Joriy yilda 18 mln. tonna sement, 48,2 mln. kv. metr qurilish oynasi, 52 mln. kv. metr keramik plitka, 95 mln. kv. metr gipsokarton, 1 mln 30 ming dona sanitar texnik buyumlar, 5,2 mln. o‘ram gulqog‘oz va boshqa shu kabi mahsulotlar ishlab chiqariladi.

Eksport hajmlarini oshirish maqsadida, Latviya, Qozog‘iston, Tojikiston, AQSH, Rossiya, Afg‘oniston davlatlarida O‘zbekiston savdo uylari va savdo omborlari tashkil etiladi.

Xususan, ushbu xorijiy davlatlarda 6 ta savdo uyi, 10 ta savdo ombori faoliyati yo‘lga qo‘yilishi natijasida 50 turdan ortiq qurilish materiallari eksport qilinadi. Shuningdek, 20 dan ortiq yirik korxonalar eksport hajmlari oshiriladi va qo‘shimcha 250 mln. dollarlik eksport imkoniyati yaratiladi.

Sohada 2025 yilda 2,4 mlrd. dollarlik 204 ta investisiya loyihasi amalga oshiriladi va 14 211 nafar yangi ish o‘rinlari yaratiladi.