Toshkentda qarzga botgan erkak o‘zini 4-qavatdan tashlab yubordi

Toshkentda fuqaro o‘zini ko‘p qavatli uydan tashlab yubordi. Toshkent shahar prokuraturasining Bugun.uz tahririyatiga ma’lum qilishicha, 38 yoshli erkak voqea joyida vafot etgan.

2023 yil 4 iyundan 5 iyunga o‘tar kechasi soat taxminan 01:50 larda Olmazor tumani IIO FMB Navbatchilik qismiga tushgan xabarga ko‘ra, Toshkent tibbiyot akademiyasining ko‘p tarmoqli klinikasiga Olmazor tumani, Qoraqamish dahasida yashagan 1985 yilda tug‘ilgan fuqaro I.A. yashash uyidan (4-qavatdan) soat taxminan 00:30 larda o‘zini tashlab yuborib, joniga qasd qilib vafot etgan holatda olib kelinganligi haqida xabar kelib tushgan.

Sud-tibbiy ekspertizasining dastlabki ma’lumotiga ko‘ra, I.A.ning o‘limi bosh ko‘krak yopiq tumtoq jarohatlari, chap chakka peshona suyagi katta bo‘lakchali sinishi, chap tomondan 2,3,4,5-qovurg‘alar yopiq sinishi, tanasida ko‘plab shilinishlar oqibatida yuz berganligini aniqlangan.

Tergovga qadar tekshiruv davomida, I.A. oilasi bilan ijarada yashaganligi, ro‘yxatdan o‘tmasdan buyurtma asosida plastik romlar ishlab chiqarish faoliyati bilan shug‘ullanib kelganligi, qarzlari ko‘payib ketganligi sababli tushkunlikda yurganligi, 4 iyundan 5 iyunga o‘tar kechasi yotoqxonadagi oyna oldida turib, sigaret chekib o‘zini tashlab yuborganligi aniqlangan.

Mazkur holat yuzasidan Olmazor tumani prokuraturasi tomonidan I.A. o‘zini tashlab yuborish sabablarini aniqlashga qaratilgan tergovga qadar tekshiruv harakatlari o‘tkazilayotgan bo‘lib, o‘limi sababini aniqlash yuzasidan sud-tibbiy ekspertizasi tayinlangan.

O‘tkazilayotgan tergovga qadar tekshiruv Toshkent shahar prokuraturasi tomonidan nazoratga olingan bo‘lib, natijasiga ko‘ra, qonuniy qaror qabul qilinadi.