Toshkent davlat yuridik universitetida “Elektron universitet” tizimi joriy etiladi

Yuridik ta’lim va fan tizimini tubdan takomillashtirish, ularning xalqaro ta’lim maydonidagi raqobatbardoshligini ta’minlash, yuridik kadrlar tayyorlash sifatini oshirish, shuningdek, O‘zbekiston Respublikasi oliy ta’lim tizimini 2030 yilgacha rivojlantirish konsepsiyasida belgilangan vazifalarni amalga oshirish maqsadida joriy yilning
29 aprel kuni O‘zbekiston Respublikasi Prezidentining “O‘zbekiston Respublikasida yuridik ta’lim va fanni tubdan takomillashtirish bo‘yicha qo‘shimcha chora-tadbirlar to‘g‘risida”gi Farmoni qabul qilindi.

Mazkur Farmonga ko‘ra, “Elektron universitet” (E-University) tizimini joriy etgan holda ochiq, shaffof, sub’ektivlik va suiiste’molchiliklardan xoli bo‘lgan ta’lim muhitini yaratish yuridik ta’lim va fanni yanada rivojlantirishning qator ustuvor yo‘nalishlari biri etib belgilandi. Shu bilan birga, Toshkent davlat yuridik universitetida “Elektron universitet” platformasini yaratish asosida yuridik ta’lim olishga bo‘lgan imkoniyatlarni yanada kengaytirish chora-tadbirlari amalga oshirilishi ko‘zda tutilmoqda.

Xususan, mazkur loyiha uchun Jahon banki tomonidan Akademik innovasiyalar fondi granti doirasida 140 ming AQSh dollari miqdorida mablag‘ ajratilib, loyihani amalga oshirish natijasida eng zamonaviy va innovasion ilmiy, o‘quv elektron dasturlarini yaratish rejalashtirilgan. Jumladan, “Elektron universitet” platformasi doirasida “Elektron tadqiqot”, “Elektron ta’lim”, “Elektron pedagog”, “Elektron talaba”, “Elektron kutubxona”, “Elektron huquqiy targ‘ibot” kabi dasturlarni yaratish va yagona global platformaga birlashtirish orqali universitet resurslaridan istalgan nuqtadan bemalol, ortiqcha qiyinchiliklarsiz foydalanish, ta’lim olish jarayoniga eng yangi axborot-kommunikasiya texnologiyalarini joriy etish kabilar ko‘zda tutilgan (Ushbu ma’lumotlar “Xalq so‘zi” online gazetasidan olindi).

Shuningdek, mazkur platformani joriy etilishi natijasida universitetda saqlanib qolgan an’anaviy ta’lim berish tizimini takomillashuviga, mavjud “shaffof ta’lim muhiti”ni yanada mustahkamlanishiga, o‘quv faoliyatidagi vujudga kelishi mumkin bo‘lgan  suiiste’molchiliklarni oldi olinadi.    

Shu o‘rinda, “Elektron universitet” (E-University) tizimining mazmun-mohiyati va uning afzallik jihatlariga to‘xtalib o‘tadigan bo‘lsak, mazkur tizim oliygohning ta’lim (o‘quv, ilmiy va boshqa sohalari) jarayoniga axborot-kommunikasiya texnologiyalarini joriy etgan holda, faoliyatni raqamlashtirish, ya’ni oliy ta’lim muassasasida elektron muhitni yaratish mazmunini beradi.

Ushbu tizimning bugungi kundagi o‘ziga xos xususiyatlari quyidagilarda namoyon bo‘ladi:

—  mazkur platforma ta’lim sifatini oshirish orqali oliy ta’lim muassasasi talabalariga keng hajmli bilim olish hamda professor-o‘qituvchilar bilan tezkor va sifatli muloqotni yo‘lga qo‘yish imkoniyatlarini taqdim etadi;

— hududiy to‘siqlarni bartaraf etgan holda ta’limning masofaviy turida tahsil oluvchi talabalarga oliy ta’lim muassasasidan tashqari bir xil ta’lim olish imkoniyatlarini beradi;  

— ortiqcha sarf-xarajatlarni sarflanishi oldi-olinadi.

Bundan tashqari, “Elektron universitet” platformasi doirasida oliy ta’lim muassasasidagi umumiy o‘quv prosessi, talabalarga o‘tilayotgan ta’lim jarayoni va professor-o‘qituvchilarning bu boradagi faoliyati, baholash tizimi hamda imtixonlarni o‘tkazilishi ustidan muntazam va tizimli nazorat amalga oshiriladi.   

Platforma orqali oliygoh xodimlari va talabalariga “yagona darcha” tizimi asosida ularga o‘quv va ishga oid hamda moliyaviy-buxgalteriya hamda boshqa faoliyat yo‘nalishlaridan kelib chiqib elektron xizmat ko‘rsatish samarali yo‘lga qo‘yiladi.

Ta’kidlash lozimki, elektron universitet tizimida tahsil oluvchilar
va faoliyat yurituvchilar axborot-texnologiyalaridan o‘z vaqtida hamda unumli foydalanish, axborot resurslari ichidan zaruriy ma’lumotlarni topish, mustaqil ishlash va tahlil qilish ko‘nikmalariga ega bo‘lishi talab etiladi.

  Shuningdek, O‘zbekiston Respublikasi Prezidentining 2020 yil
2 martdagi “2017 — 2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Ilm, ma’rifat va raqamli iqtisodiyotni rivojlantirish yili”da amalga oshirishga oid Davlat dasturi to‘g‘risida”gi PF-5953-son Farmonining 19-bandiga muvofiq, 2020/2021 o‘quv yilidan boshlab Toshkent davlat yuridik universitetida tajriba tariqasida bosqichma-bosqich masofaviy o‘qitish shakli joriy etilishi belgilangan. “Elektron universitet” platformasi orqali mazkur Farmondan kelib chiqib,  yuqorida qayd etilgan tizim tarkibiga kiruvchi maxsus dasturlar yordamida universitetda masofaviy ta’lim berish jarayoni samarali amalga oshiriladi.

Elektron universitet tizimining joriy etilishi o‘z navbatida ta’lim berish jarayonida foydalaniladigan o‘quv va o‘quv-uslubiy materiallarni fanlar kesimida qayta ishlov bergan holda rivojlantirishni talab etadi. Bunda modullar kesimida interaktiv usullarda ta’lim berish uchun mo‘ljallangan elektron o‘quv adabiyotlari, taqdimot-slaydlari, audio va video-ma’ruzalar hamda elektron testlar ishlab chiqilib, platformaga joylashtirish choralari amalga oshiriladi.

Xulosa o‘rnida ta’kidlash lozimki, raqamli iqtisodiyotga o‘tish bosqichida oliy ta’lim sohasini ham raqamlashtirilishi yuridik ta’lim va fan tizimini tubdan takomillashtirishda hamda ularning xalqaro ta’lim maydonidagi raqobatbardoshligini ta’minlashga xizmat qiladi.

D. BAZAROVA,

Toshkent davlat yuridik universiteti

Jinoyat-prosessual huquqi va kriminalistika

                                                                                                                     kafedrasi professori v.b., yu.f.n