Tibbiy ta’lim yo‘nalishida 10 ta muhim o‘zgarish nimalardan iborat?

So‘nggi yillarda yurtimizda tibbiyot yo‘nalishida ilg‘or ta’lim standartlari asosida yuqori bilimga ega mutaxassislar tayyorlashga alohida e’tibor qaratilmoqda. Sog‘liqni saqlash vazirligi boshqarma boshlig‘i O‘ktam Ismailov tibbiy ta’lim sohasida yuz bergan 10 ta eng muhim o‘zgarish haqida ma’lumot berdi:

1️⃣ Eng avvalo, oliy tibbiy ta’lim muassasalari soni 11 taga yetdi.

Toshkent tibbiyot akademiyasining Termiz filiali, Farg‘ona jamoat salomatligi tibbiyot instituti (FJSTI) va Qoraqalpoq tibbiyot institutlari tashkil etildi.

2️⃣ Toshkent, Sirdaryo, Jizzax Navoiy, Qashqadaryo va Namangan viloyatlari oliy ta’lim muassasalarida 6 ta tibbiyot fakulteti ochildi.

3️⃣ Buxoro shahrida zamonaviy qulayliklarga ega tibbiyot kampusi bunyod etildi.

4️⃣ Buxoro davlat tibbiyot institutida Turkiyaning sog‘liq bilimlari universiteti bilan hamkorlikda Turkiya tibbiyot fakulteti, Toshkent shahrida N.I. Pirogov nomidagi Rossiya tibbiyot universitetining filiali va Jizzax shahrida Qozon federal universiteti filiali tashkil etildi.

5️⃣ Rossiya, Koreya, Germaniya, Turkiya, Hindiston, Italiya, Xitoy, Polsha, Belarus, Ukraina kabi qator davlatlarining 22 ta universiteti bilan 12 ta bakalavriat ta’lim yo‘nalishi, 10 ta magistratura va 8 ta klinik ordinatura mutaxassisliklari bo‘yicha xalqaro qo‘shma ta’lim dasturlari asosida kadrlar tayyorlash tizimi yo‘lga qo‘yildi.

6️⃣ Bakalavriatda 4 ta yangi ta’lim yo‘nalishi ochilib, qabul kvotasi 2,4 barobar, magistraturada ochilgan 14 ta yangi mutaxassiclik hisobiga kvotalar 3 barobar, klinik ordinaturadagi 6 ta yangi mutaxassislik hisobiga esa kvotalar soni 2 barobarga oshirildi.

7️⃣ Internatura joriy etilib, 19 ta yo‘nalishda yiliga 500 nafar tor soha mutaxassisi tayyorlanmoqda.

8️⃣ O‘quv rejalaridagi nomutaxassis fanlar ulushi 2 barobarga qisqartirildi.

9️⃣ Xorijdan 350 nafar professor-o‘qituvchi o‘quv jarayoniga jalb qilindi. Natijada ilmiy salohiyat 32 foizdan 46 foizga oshdi.

🔟 6 ming nafar bitiruvchi kurs talabalarini jalb qilgan holda, oilaviy shifokorlar vakansiyasi 80 foizga, tor mutaxassislar esa vakansiyasi 50 foizga qisqardi.