SSV: Hududlardagi qon bilan ishlash muassasalariga ko‘chma donorlik komplekslari topshirildi

Bugun poytaxtimizdagi "Texnopark" majmuasida Respublika qon quyish markazining hududlardagi qon bilan ishlash xizmati muassasalariga 13 ta ko‘chma donorlik kompleksi – maxsus avtobuslarni topshirishga bag‘ishlangan tadbir bo‘lib o‘tdi.

✅ Unda vazirlik va markaz mutaxassislari, sohaga aloqador tibbiyot muassasalari xodimlari hamda keng jamoatchilik vakillari ishtirok etdi.

🔬 Ta’kidlanganidek, keyingi yillarda yurtimizda noyob yurak operasiyalari, inson tana a’zolarini ko‘chirib o‘tkazish kabi murakkab jarrohlik amaliyotlarining yo‘lga qo‘yilishi hamda xavfli kasalliklar diagnostikasining yaxshilanishi sababli sifatli qon komponentlariga bo‘lgan ehtiyoj yanada ortdi.

🩸Birgina misol. Bugun bitta jigar transplantasiyasi uchun 30 litrgacha qon plazmasi zarur. Bu komponent esa 120 nafar insondan olinadi. Shuning o‘ziyoq donorlikning ahamiyati naqadar muhim ekanini ko‘rsatadi.

📊 Bundan tashqari, Jahon sog‘liqni saqlash tashkiloti tavsiyasiga ko‘ra, davlatlar o‘z aholisining qonga bo‘lgan ehtiyojini qoplash uchun donorlar soni har 1000 kishiga 30 nafar va undan ortiq bo‘lishi lozim. Bizda esa bu raqam qariyb 7,5 nafarni tashkil qilmoqda.

📌 Tadbirda shu haqda so‘z yuritilar ekan, yurtimizda sayyor donorlikni rivojlantirish, buning uchun hududlarda sifatli qon komponentlarini yig‘ish ishlarini samarali tashkil etish lozimligi alohida qayd etildi.

🚌 Hududlarga taqdim etilgan “ISUZU HC40” rusumli avtotransport vositalari negizida tayyorlangan ushbu ko‘chma donorlik majmualari esa bu borada ayni muddao bo‘ldi. Aytish kerak, mazkur avtobuslar maxsus karavot, muzlatkich, gemokonteyner, havoni tozalashga mo‘ljallangan bakteriyaga qarshi lampalar, kondisioner hamda yoritkichlar bilan jihozlangan. Unda bir vaqtning o‘zida 3 nafar donordan qon olish mumkin.

— Zamonaviy tibbiyot qanchalik taraqqiy etmasin, hozircha inson qonining to‘laqonli muqobili yaratilgani yo‘q, — deydi Respublika qon quyish markazi direktori A’lonur Saidov. — Ayni sababdan donorlik masalasi hamisha dolzarb.

📈 Ta’kidlash kerak, o‘tgan 2022 yil yurtimizda 120 tonna sifatli donor qoni tayyorlanib, qon zaxiralarining 3/1 qismi hududlar hissasiga to‘g‘ri keldi. Biroq bugungacha joylardagi qon xizmatlarida mana bunday maxsus avtobuslarning yo‘qligi ishni sifatli tashkil etishga to‘sqinlik qilayotgan edi.

📑 Prezidentimizning “Respublikada qon bilan ishlash xizmati muassasalari faoliyatini yanada takomillashtirish va aholi orasida beg‘araz donorlik harakatini choralari to‘g‘risida”gi qarori esa bu borada ayni muddao bo‘ldi. O‘ylaymanki, ushbu ko‘chma donorlik komplekslari soha xodimlari faoliyatini samarali yo‘lga qo‘yishga xizmat qiladi.