Sport vaziri Belarus Respublikasi elchisi bilan uchrashdi
Bugun, 16-aprel kuni O‘zbekiston Sport vaziri Adkham Ikramov Belarus Respublikasining O‘zbekistondagi Favqulodda va Muxtor elchisi Leonid Marinichni qabul qildi.
Uchrashuv avvalida tomonlar ikki mamlakat o‘rtasidagi do‘stlik va hamkorlik aloqalari yangi bosqichga olin chiqilayotganini ta’kidlab bu borada har bir sohada keng ko‘lamli ishlar amalga oshirilayotganini qayd etib o‘tdi.
Shu o‘rinda Sport vaziri A.Ikramov joriy yil fevral oyida Belarus Respublikasi Prezidenti Aleksandr Lukashenkoning O‘zbekistonga tashrifi doirasida o‘tkazilgan tadbirlar va ikki tomonlama uchrashuvlarni xotirlab, sport sohasida hamkorlik aloqalari yangi davrga kirganini ta’kidladi.
Xususan bugungi kunga qadar O‘zbekiston va Belarus mamlakatlari sport sohasiga oid tashkilotlari hamkorligida sportni rivojlantirishga oid qator hujjatlar imzolangan bo‘lib, ular doirasida ikki mamlakat sport bazalarida boks, tayekvondo, futzal, dzyudo kabi sport turlari bo‘yicha qo‘shma mashg‘ulot yig‘inlari tashkil etilib kelinmoqda.
Shu qatorda elchi L.Marinich tomonidan O‘zbekistonda sport sohasiga qaratilayotgan yuksak e’tibor o‘z natijasini berayotgani, so‘z isboti sifatida Belarus Respublikasida o‘tgan yili avgust oyida o‘tkazilgan II MDH o‘yinlarida o‘zbek sportchilar yuqori natijalari qayd etganini ta’kidladi.
Shu bilan birga elchi janoblari tomonidan hamkorlik aloqalarini yanada mustahkamlashga oid qator takliflar ilgari surildi. Xususan joriy yilda Belarusda suv sport turlari bo‘yicha yoshlar o‘rtasida o‘tkaziladigan musobaqalarga o‘zbek sportchilarini ham taklif qiladi. Shuningdek bir nechta sport turlari bo‘yicha qo‘shma mashg‘ulot yig‘inlarini o‘tkazish va bunda Belarus hamda O‘zbekistonda mavjud sport bazalarida samarali foydalanish takliflari ilgari surildi.
Uchrashuv elchi tomonidan O‘zbekistonda o‘tkazilishi rejalashtirilgan Futzal bo‘yicha Jahon chempionati va 2025-yilda bo‘lib o‘tadigan yoshlar o‘rtasidagi Osiyo va Paraosiyo o‘yinlarini yuqorida saviyada o‘tkazib olishda omad tiladi.
