Saudiya Arabistonida ish haftasi qisqarishi mumkin
Saudiya Arabistoni ish haftasini qisqartirish va uch kunlik dam olish kunini joriy etish imkoniyatini ko‘rib chiqmoqda, deya ma’lum qildi mamlakat Inson resurslari va ijtimoiy rivojlanish vazirligi.
Ijtimoiy tarmoqlardagi so‘rovga javoban vazirlikning Twitterdagi qo‘llab-quvvatlash guruhi hozirda ish tizimini o‘rganayotganini va ta’tilni ikki kundan uch kunga uzaytirish masalasini ko‘rib chiqayotganini aytdi.
Mumkin bo‘lgan o‘zgarishlar vazirlikning davriy baholashi doirasida ko‘rib chiqilmoqda, bunda ekspertlar ish o‘rinlari sonini ko‘paytirish va mehnat bozorini mahalliy hamda xalqaro investisiyalar uchun yanada jozibador qilish yo‘llarini tahlil qiladi.
Ish haftasini qisqartirish to‘g‘risidagi hujjat loyihasi ham jamoatchilik muhokamasi uchun saylov platformasida mavjud.
Amalga oshirilsa, Saudiya Arabistoni Birlashgan Arab Amirliklaridan keyin qisqaroq ish haftasini joriy qilgan ikkinchi davlatga aylanadi.
2022 yil 1 yanvardan BAA yangi 4 yarim kunlik ish haftasiga o‘tdi va dam olish kunlarini juma-shanbadan shanba-yakshanbaga o‘tkazdi. Juma kunlari jamoat tashkilotlari va maktablar faqat tushgacha ishlaydi.
BAAning Sharja shahrida xodimlar haftasiga uch kun, jumladan, juma, shanba va yakshanba kunlari dam olishadi.
Sharjada to‘rt kunlik ish haftasi joriy etilganidan bir yildan ko‘proq vaqt o‘tgach, hukumat tomonidan o‘tkazilgan tadqiqot shuni ko‘rsatdiki, xodimlarning unumdorligi, baxtiyorligi va ruhiy salomatligi 90 foizga oshgan.
Tadqiqot shuni ko‘rsatdiki, qisqaroq hafta ishlagan xodimlar orasida ishdan qoniqish darajasi 90 foizga oshgan, respondentlarning 84 foizi yangi islohotlar ularga ish va hayot muvozanatiga erishishga yordam berganini aytishgan.
