Sanjar Tursunov professional boksda debyut qiladi

Birinchi og‘ir (-90 kg) vazn toifasida ringga chiqadigan o‘zbekistonlik bokschi Sanjar Tursunov 8 noyabr kuni professional boksdagi debyut jangini o‘tkazadi. Bu haqda "turon24" ma’lum qildi.

Tursunovning aytishicha, ilk jangidagi raqibi meksikalik Migel Kubos bo‘ladi. Jang 8 noyabr (Toshkent vaqti bilan 9 noyabr tongi) kuni Kaliforniyada, Indio shahridagi "Fantasy Springs Casino" arenasida bo‘lib o‘tadi. Jang 4 raunddan iborat bo‘lishi ko‘zda tutilgan.

29 yoshli Migel Kubos professional boksda 30 ta jang o‘tkazib, ularning 11tasida g‘alaba (8 ta nokaut) qozongan, 19 ta jangda imkoniyatni boy berib qo‘ygan.