Qashqadaryoda enaganing eri chaqaloqni urib o‘ldirib qo‘ydi

Qarshi shahrida 21 yoshli erkak hojatini kiyimiga chiqargani uchun turmush o‘rtog‘i enagalik qilayotgan 1,5 yashar chaqaloq qizni urib o‘ldirib qo‘ydi. U shifokorlarga bola aravachadan yiqilib tushganini aytdi. Unga nisbatan jinoyat ishi qo‘zg‘atildi.

Qashqadaryo viloyati Qarshi shahrida 20 iyul kuni erkak 1,5 yoshdagi chaqaloqni o‘ldirib qo‘ydi, deb xabar berdi Bosh prokuratura matbuot xizmati.

Qayd etilishicha, I.N. ismli (2023 yilda tug‘ilgan) chaqaloq qizcha tushlik vaqtida kiyimiga xojatini chiqargan. Shu sababli N.S. (2001 y.t.) mushti bilan uning ko‘krak qafasi va qorin sohasiga bir necha marotaba urib, qasddan o‘ldirgan.

Bosh prokuraturaning yozishicha, u chaqaloqni parvarishlovchi enaga T.A.ning turmush o‘rtog‘i bo‘lgan.

Erkak 21 iyul kuni shifokorlarga chaqaloq aravachadan yiqilib tushganini aytgan.

N.S.ga nisbatan Jinoyat kodeksining 97-moddasi 2-qismi «v» bandi (Aybdorga ayon bo‘lgan ojiz ahvoldagi shaxsni qasddan o‘ldirish) bilan jinoyat ishi qo‘zg‘atildi, gumonlanuvchi qo‘lga olindi.