Qashqadaryoda 8-sinf o‘quvchisi qanday qilib homilador bo‘lib qoldi? Batafsil (VIDEO)
Qashqadaryo viloyati Qamashi tumani Chim mahallasida joylashgan maktab o‘quvchisi C.C. 2019 yil 8-sinfda tahsil olayotgan paytda o‘zining tengdoshi N.A bilan jinsiy aloqa qilib, homilador bo‘lib qolganini aytmoqda. Oradan vaqt o‘tib 2020 yil mart oyida qizdan qiz farzand dunyoga keldi. Ayni paytda C.C. bir yoshga to‘lgan qizaloqni tarbiyalmoqda.
Voqea haqida «Nasafnews»ga ma’lumot bergan qiz va onasining aytishicha, tug‘ilgan bolaning otasi begona emas. Ya’ni qizning tengdoshi yigit N.A. ularga yaqin qarindosh.
«2019 yil may oyida ko‘richak bo‘ldim. O‘sha paytlari birga o‘qiydigan tengdoshim N. A. uyga ovqat olib keldi. Keyin dars qilamiz deb aytdi. Keyin kitob olgani shkafni yoniga borgandim, og‘zimni qoplab, qo‘limni qaytardi. Meni majburlab, zo‘ravonlik qildi. «Men seni olaman, hech kimga aytma, bo‘lmasa o‘ldirib ketaman» degan tahdid bilan uyiga ketdi. Ertasi kuni yana yugurib chopib kirib keldi. Men qo‘rqqanimdan derazadan qochmoqchi bo‘lgandim, meni og‘zimni qopladida qo‘limni qaytardi. Yana zo‘ravonlik qilib, majburladi. Hushimdan ketib qoluvdim, uyg‘onsam qo‘limni o‘qalab o‘tirgan ekan. Keyin yana «men seni olaman, hech kimga aytma, agar aytsang o‘ldirib ketaman, hech kim bilmaydi, o‘ligingni topolmaydi» dedi. Tahdid qilib qo‘rqitib ketdi»,- deydi qiz.
Qizning onasi Z. Bozorova bu voqealar sodir bo‘lganida o‘z uyida bo‘lmaganini aytdi.
«Biz 2019 yil aprel oyida turmush o‘rtog‘im bilan daladan yer olib, pomidor ekkandik. Pomidor chopig‘iga qo‘shnilar va qizlarni olib ketganmiz. Yon qo‘shnim, ammamning o‘g‘li biz yo‘qligimizdan foydalanib, qizimning nomusiga tekkan. Qizimga «bo‘lgan voqeani aytsang, o‘ldiraman» der ekan. Sochlarini yulib, yigit urarkan. Bo‘lgan voqeadan qo‘rqib, bizga aytmagan. Men uni homiladorligini homila 7 oylik bo‘lganda bildim. Qamashi tumani Ichki ishlariga murojaat etdik. Bolani sog‘ligi uchun javob berasizlar deb biz 2 oy davolatdik. Bola karantin vaqtida tug‘ildi. Hozirgi kunda men ichki ishlarga va qator tashkilotlarga murojaat qilib chiqdim. Lekin bolalar voyaga yetmagan deb bittayam chora ko‘rilmagan. 2020 yil 7 yanvar kuni Toshkent shahriga borib portalga yozma ravishda murojaat tashladim. Undan tashqari Ichki ishlar vazirligiga, inson huquqlarini himoya qilish tashkilotiga, Tanzila Norboyevagacha murojaat qildim. Xatning javobi faqat Qamashi tuman ichki ishlari bo‘limiga kelgan. Ichki ishlarning esa menga yozgan javobi bir xil kelyapti»,- deydi qizning onasi Z. Bozorova.
Z.Boxzorova murojaatlardan natija bo‘lmagandan so‘ng, otalikni aniqlash bo‘yicha DNK ekspertizasi o‘tkazilgan.
«DNK da hammasi aniq bo‘ldi. 99 foiz bola ammamning o‘g‘lidan ekaninini bildik. Lekin ammam hammasidan bo‘yin tovlab, «sen DNKni tanish-bilish qilib o‘tkazding»- deb men bilan janjal qildi»,- deydi u.
Manba holat yuzasidan mahalla raisi va uning o‘rinbosarlaridan ham video intervyu oldi.
Shuningdek, yuqoridagi ishni ko‘rgan Qamashi tuman IIB huzuridagi tergov bo‘limi tergovchisi A.Nosirov bilan bog‘langanimizda voyaga yetmagan bola N.A. jinoyat sodir qilgan vaqtida jinoiy javobgarlikka tortish mumkin bo‘lgan yoshga to‘lmaganligi sababli ayblilik masalasi hal qilmasdan turib jinoyat ishi tugatilganini ma’lum qildi.
Tergovchi qo‘shimcha ma’lumotlari faqatgina Qashqadaryo viloyat ichki ishlar boshqarmasi axborot xizmatidan olishimiz kerakligini aytdi. Ammo IIBga bog‘lanishlarimiz besamar ketdi.
Nasafnews.uz mazkur holat yuzasidan video ko‘rsatuv ham tayyorladi. Videoda voqealar haqida ko‘proq ma’lumot beriladi.
