Moskvada odam o‘ldirgan o‘ta xavfli residivist O‘zbekistonga qaytib, yana qotillikka qo‘l urdi

Moskvada odam o‘ldirgan o‘ta xavfli residivist O‘zbekistonga qaytib, yana qotillikka qo‘l urdi

40 yoshli, bo‘ydoq, muqaddam Rossiya Federasiyasi, Moskva oblasti, Jukovskiy shahar sudining 2011 yil 7 fevraldagi hukmiga ko‘ra, Rossiya Federasiyasi Jinoyat Kodeksi 105-moddasining 1-qismi, 115-moddasining 1-qismi bilan JKning 69, 71-moddalariga asosan 8 yil 6 oy ozodlikdan mahrum qilingan, jazoni 2019 yil 23 mayda to‘liq o‘tab chiqqan sudlanuvchi o‘ziga tegishli xulosa chiqarish o‘rniga takror jinoyatga qo‘l uradi. Bu haqda jinoyat ishlari bo‘yicha Bektemir tuman sudi sudyasi Akmal Mirzaxonov xabar qildi, deb yozadi "Darakchi".

Toshkent shahar, Bektemir tumanidagi uyda ikki kishi bilan birga ovqatlanib, spirtli ichimliklar iste’mol qilishadi. Shu kuni soat 21:00 larda mast holda bo‘la turib, arzimagan sabab tufayli sheriklaridan biri bilan janjallashib, bir-birlarini haqoratlashga o‘tadi. Shu vaqtda sherigini dastlab tanasining yuz va boshqa sohalariga urib-tepib ko‘plab jarohatlar yetkazadi. So‘ng uni qasddan o‘ldirish maqsadida qurol sifatida foydalanish uchun xonaning chiqish eshigi yonida bo‘lgan bolg‘ani qo‘lga oladi. Tan jarohatlari oqibatida yerda yotgan sherigining bosh qismiga ikkinchi sherigining ko‘z o‘ngida o‘ta shafqatsizlik bilan bir necha marotaba urib, uni qasddan o‘ldiradi. 

Shuningdek, sudlanuvchi sherigini qasddan o‘ldirgandan so‘ng o‘sha tunda jinoiy harakatlarini davom ettiradi. Aniqrog‘i, marhumning sumkasida bo‘lgan 1 mln. 200 ming so‘m pullarini yashirin ravishda talon-toroj qiladi va hodisa sodir bo‘lgan joydan yashirinadi. 

“AFSUS-NADOMAT CHEKAYAPMAN”

Sudda sudlanuvchi ayblovga qisman iqrorlik bildirdi...

— 2000 yil avgustda ishlab pul topish maqsadida Moskvaga ketganman. Qasddan odam o‘ldirganim uchun sudning hukmi bilan ozodlikdan mahrum qilinganman. Ozodlikka chiqqach, O‘zbekistonga deportasiya qilindim. Ishsiz bo‘lganim uchun ishlab pul topish maqsadida, 2020 yil 20 sentyabr kuni Toshkentga, ya’ni “Qo‘yliq” bozoriga bordim. 

21 sentyabrda “Qo‘yliq”dagi mardikor bozoriga ishga chiqib, shu kuni o‘zini “Akbar” (ism-familiyalar o‘zgartirilgan) deb tanishtirgan A.Azizov bilan tanishdim. U menga ish taklif qilib, “Yangiobod ixtisoslashtirilgan” bozorida savdoga yordamchi bo‘lib ishlashim, kuniga 80 ming so‘mdan oyiga 2 mln. 400 ming so‘mga ish haqiga kelishdik. 

22 sentyabrdan 25 sentyabrga qadar har kuni erta tongda uyg‘onib, ikkalamiz birga uning boshqaruvidagi “Moskvich”da bozorga bordik. Savdo do‘konlarini ochib savdoni boshlab, shu kunlari kechgacha bozorda ishlab kech soat 19:00larda yana birga uyiga qaytdik. Ovqatlanib bo‘lib, dam olgani o‘zimga ajratilgan xonaga kirib uxladim. Menga vazifa sifatida do‘konni ochish, narsa buyumlarni do‘kon oldiga olib chiqib qo‘yish, u tomonidan aytilgan mahsulotini olib berib turish va oxirida yig‘ishtirib do‘konni yopib uyga qaytish edi. 

24 sentyabr soat 15:00larda N.Mirzayevni IIB xodimlari do‘konga olib kelishdi. Akbar bilan uchrashtirib, uning olib ketgan pullari evaziga do‘konida ishlab berishga kelishtirib ketishdi. Shu kuni uchchalamiz uyga kech soat 19:00 larda qaytdik. Doimgidek ovqatlanib uxladik. 

25 sentyabr kuni erta tongda uchalamiz birga bozorga ketdik. Bozorda ishlarni boshlab, savdo qildik. Shu kuni soat 11:00larda Akbar qo‘shni do‘konda savdo qiladigan odam tashlagan axlatlarini menga yig‘ishtirib olishimni aytgani uchun o‘zaro tortishib qoldik. “Xo‘p”, deb buyruqni bajardim. Biroq menga “nega boshqa do‘konlarning axlatini biz yig‘ishtiramiz, ular boshqa-ku”, deganimda Akbar “pulingni to‘laganimdan keyin nima ish bo‘lsa qilasan”, dedi. Shu bilan kech soat 19:00larda uchchalamiz uyga qaytish uchun yo‘lda ketayotganimizda, ikki sherigim do‘kondan aroq, pivo, “sigaret”, salqin ichimlik, “tushonka”, non va tovuq “gril” olishdi. Keyin uchchalamiz birga o‘tirib kechki ovqatni tanovul qildik. Akbar xontaxta atrofida men bilan qarama-qarshi, N.Mirzayev esa uning yonida o‘tirgandi. Ikkalasi ichishni boshlashdi. O‘zaro suhbat jarayonida Akbarga “bozorda noto‘g‘ri tanbeh berding. Qo‘shni do‘kon axlatini yig‘ishtirish meni vazifamga kirmaydi”, dedim. Akbar “pulini to‘laganimdan keyin xohlagan ishimni qildiraman”, deya kurakda turmaydigan so‘zlar bilan haqorat qildi. Gapidan jahlim chiqib, “bunday og‘ir gapirma, jahlim yomon. Urib qolishim mumkin”, dedim. Ikkalasi xontaxta oldida o‘rnidan turdi. Shu payt Akbar menga musht ko‘tardi, biroq tegmadi. Keyin xontaxta ustida turgan oshxona pichog‘ini olib, “tiqaman” deya qo‘limga oldim. “Agar pichoq tiqmasang”, deb onamni qo‘shib, kurakda turmaydigan so‘zlar bilan so‘kdi. Pichoqni xontaxta ustiga qo‘yib, qo‘lim bilan yuzi va oyog‘im bilan tanasining duch kelgan joyiga urdim. Hovliga chiqib, tamaki chekib qaytib kirdim.

Oldiga kirib, gaplashmoqchi bo‘lganimda yana haqorat qilib, menga tashlandi. Itarib yuborgandi, divanga o‘ng yon-bosh tomonim bilan yiqildim. Keyin xonada turgan bolg‘ani olib, boshining orqa tomoniga 4-5 marotaba urdim. U yiqilib xushini yo‘qotdi. Uning sport sumkasidan pasportim, sumkadagi 1 mln. 200 ming so‘mni olib chiqib ketdim. Ko‘chada Akbarning turmush o‘rtog‘iga qo‘ng‘iroq qilib, manzilini so‘rab, erini urganimni aytish uchun oldiga “Kadisheva” bozori tomonga bordim. Bo‘lib o‘tgan holatni aytib, katta ko‘chaga chiqib, “Qo‘yliq” bozoridagi vodiyga qatnaydigan taksilar turar joyiga ketdim. 5 daqiqa o‘tib, haydovchidan “orqamizdan mashina kuzatib kelmayaptimi?” deb so‘raganimda, “yo‘q” dedi. Keyin orqaga qaytib, marhumning uyi tomonga aylanib bordim. Shu payt orqamda mashina borligini sezib, aylanib yuraverdim. Bir soatlar o‘tgach, fuqarolik mashinasidagi IIB xodimlari to‘xtatib, IIB binosiga olib ketishdi... 

Oilaviy sharoitim og‘ir, yolg‘iz o‘g‘ilman, qaramog‘imda qari kasalmand onam bor. Sodir etgan qilmishimdan chin ko‘ngildan pushaymonman, afsus-nadomat chekayapman. 

O‘TA XAVFLI RESIDIVIST DEB TOPILDI

Sudlanuvchi JK 97-moddasi 2-qismining “j”, “l”, “r” bandlari va 169-moddasi 2-qismining “a” bandida nazarda tutilgan jinoyatlarni sodir etganlikda aybli deb topildi. JK 59-moddasiga asosan jazolarni qisman qushish yuli bilan uzil-kesil 15 yil 1 oy ozodlikdan mahrum qilish jazosi tayinlandi.

Sudlanuvchi JK 34-moddasi 3-qismining “a” bandiga asosan o‘ta xavfli residivist deb topildi va jazoni maxsus tartibli koloniyalarda o‘tash tayinlandi.


Matnda xatolik topsangiz, o‘sha xatoni belgilab, bizga jo‘nating (Ctrl + Enter)

Bo'limga tegishli qiziqarli xabarlar

Fikr bildirish uchun qaydnomadan o'tishingiz so'raladi va telefon rakamni tasdiklash kerak buladi!