Isroil «insoniyatga qarshi yangi jinoyat» qildi

Turkiya Isroilning maktabga uyushtirgan zarbasini qoraladi.

Turkiya Tashqi ishlar vazirligi Isroilning G‘azo shahrining Al Daraj hududidagi maktabga uyushtirgan havo hujumi oqibatida 100 dan ortiq tinch aholi halok bo‘lganiga izoh berdi. Turkiya Tashqi ishlar vazirligi hujumni «insoniyatga qarshi yangi jinoyat» deb baholadi va Netanyaxu hukumatini o‘t ochishni to‘xtatish bo‘yicha muzokaralarni sabotaj qilishda aybladi.

G‘azo hukumatiga ko‘ra, isroilliklarning uchta raketasi ko‘chirilgan odamlar boshpana olayotgan Al-Tabin maktabiga tushgan. G‘azo fuqarolik mudofaa agentligi voqeani «dahshatli qirg‘in» deb ta’riflab, ba’zi jasadlar alanga ichida qolganiga e’tibor qaratdi. Hujum bomdod namozi vaqtida, namozxonada 250 ga yaqin odam bo‘lgan vaqtda sodir bo‘lgan.

Isroil armiyasi zarbaning «Hamas qo‘mondonlik va nazorat markazi»ni nishonga olganini va tinch aholining qurbon bo‘lish xavfini kamaytirish uchun choralar ko‘rilganini aytdi. Biroq, bu haqda hech qanday dalil keltirilmagan.

«Isroilni to‘xtatish uchun choralar ko‘rmagan xalqaro ishtirokchilar bu jinoyatlarga sherik bo‘lishadi», — deyiladi Tashqi ishlar vazirligi bayonotida.

G‘azo hukumati hodisani Falastin xalqiga qarshi «genosid va etnik tozalash jinoyati» sifatida baholadi.