DXA «Vapshe malades bala» MCHJning ro‘yxatdan o‘tkazilganiga tushuntirish berdi

«Vapshe malades bala» mas’uliyati cheklangan jamiyati 11 may kuni Davlat xizmatlari markazi tomonidan ro‘yxatga olingani haqida xabar berilgandi. Davlat xizmatlari agentligi Jizzax viloyat boshqarmasi yuridik shaxslarni davlat ro‘yxatidan o‘tkazuvchi vakolatli organ sifatida mazkur vaziyatga oydinlik kiritdi. Bu haqda "Daryo" yozmoqda.

«Tadbirkorlik faoliyati erkinligining kafolatlari to‘g‘risida»gi qonunining 33-moddasiga asosan yuridik shaxs bo‘lgan tadbirkorlik faoliyati sub’ekti firma nomiga bo‘lgan huquqqa ega, bu nomni uning o‘zi mustaqil ravishda belgilaydi va o‘z ta’sis hujjatlarida ko‘rsatadi.

Mas’uliyati cheklangan jamiyatni davlat ro‘yxatidan o‘tkazishni 2 ta usul bilan amalga oshirish mumkin:

• «my.gov.uz» yoki «fo.birdarcha.uz» orqali;
• Davlat xizmatlari markazlariga tashrif buyurgan holda.

«Yuqorida nomi qayd etilgan MCHJ haqiqatan ham Jizzax shahri hududida davlat ro‘yxatidan o‘tkazilgan. Ammo mazkur jarayon Davlat xizmatlari markazi orqali emas, balki tadbirkorning o‘zi tomonidan onlayn tarzda amalga oshirilgan», — deyiladi xabarda.

Vazirlar Mahkamasining 2017 yil 9 fevraldagi 66-son qarori bilan tasdiqlangan tadbirkorlik sub’ektlarini davlat ro‘yxatidan o‘tkazish tartibi to‘g‘risidagi nizomning 9-bandiga asosan, mas’uliyati cheklangan jamiyatni davlat ro‘yxatidan o‘tkazish uchun ariza beruvchi o‘zining shaxsiy kabineti yoki «tadbirkorlik sub’ektining shaxsiy kabineti»dan erkin foydalanish imkoniga ega bo‘lgandan so‘ng:

• «biznesni ro‘yxatdan o‘tkazish» — davlat xizmatini tanlaydi;
• tadbirkorlik sub’ektlari — yuridik shaxslarga tegishli so‘rovnomani shakllantiradi;
• so‘rovnoma shakllantirish jarayonida ariza beruvchi tomonidan firma nomini tanlash va bir xilligining tekshirilishi tizim tomonidan avtomatik tarzda amalga oshiriladi;
• so‘rovnomaga davlat tilidagi ta’sis hujjatlari (ariza beruvchi ta’sis hujjatlarini o‘z ixtiyoriga ko‘ra qonun hujjatlari talablarini inobatga olgan holda namunaviy shakllar asosida yoki boshqa shakllarda rasmiylashtirish huquqiga ega) ilova qilinadi;
• so‘rovnoma oxiriga yetganidan so‘ng davlat boji to‘lovi amalga oshiriladi.

Ma’lumot tariqasida, «Firma nomlari to‘g‘risida»gi qonunining 4-moddasiga asosan firma nomida:

• davlatning rasmiy nomi, xalqaro, hukumatlararo yoki nodavlat notijorat tashkilotining qisqartirilgan yoki to‘liq nomi;
• tarixiy yoki O‘zbekistonda mashhur bo‘lgan shaxsning to‘liq yoki qisqartirilgan ismi, belgilangan tartibda beriladigan ruxsatsiz;
• firma nomining egasi, uning faoliyat turi yoki u kelib chiqqan mamlakat xususidagi soxta yoki iste’molchini chalg‘itishi mumkin bo‘lgan belgilar;
• jamiyat manfaatlariga, insonparvarlik va axloq prinsiplariga zid bo‘lgan belgilar ko‘rsatilmasligi kerak.