BMT Ukrainadagi urushda harbiy asirlarni o‘ldirish bo‘yicha 39 ta holatni aniqladi

Birlashgan Millatlar Tashkiloti Inson huquqlari bo‘yicha Oliy komissari boshqarmasining (IHOKB) monitoring missiyasi Ukrainadagi urush paytida rossiyaliklar tomonidan kamida 14 nafar ukrainalik harbiy asirni, shuningdek, ukrainaliklar tomonidan kamida 25 nafar rossiyalik harbiy asirni qatl qilish holatlarini qayd etdi. Bu haqda missiya hisobotida ma’lumot keltirilgan.

IHOKB hisobotiga ko‘ra, Rossiya Qurolli Kuchlari nazorati ostidagi hududda 14 nafar ukrainalik harbiy asirning qatl qilinishi, shuningdek, 6 nafari tibbiy yordam ko‘rsatilmaganligi sababli vafot etishi holatlari hujjatlashtirilgan. Hisobotda aytilishicha, 142 nafar ukrainalik harbiy asirning 86 foizi Rossiya asirligida qiynoqlar va shafqatsiz munosabatga duch kelganini ma’lum qilgan.

Shu bilan birga, BMT kuzatuv missiyasi rahbari Matilda Bogner so‘zlariga ko‘ra, urush paytida ukrainalik harbiy asirlarning qatl qilinishi bo‘yicha 15 ta holat qayd etilgan. «Vagner» XHK ushbu qatllarning 11 tasini amalga oshirdi», dedi Bogner.

Shuningdek, hisobotga ko‘ra, Ukraina qurolli kuchlari vakillari tomonidan taxminan 25 nafar rossiyalik harbiy asir va jangga layoqatsiz shaxslar qatl etilgan. Ukraina hukumati harbiy asirlarni qatl qilish bilan bog‘liq 25 ta holatdan 22 tasi bo‘yicha sudgacha tekshiruvni boshlagan. Ammo tergovlar jinoyatni sodir etganlikda gumon qilinayotgan shaxslarga nisbatan hozircha ayblov qo‘yishga olib kelmagan.

IHOKB hisoboti 400 nafar harbiy asir o‘rtasida o‘tkazilgan so‘rovga asoslanadi, ulardan 142 nafari Rossiya asirligida bo‘lgan ukrainaliklar, 258 nafari esa Ukraina asirligidan ozod qilingan rossiyalik harbiylardir. Birlashgan Millatlar Tashkilotining qayd etishicha, kuzatuv missiyasi Rossiyada va Rossiya Qurolli kuchlari nazorati ostidagi hududda asirlikda saqlanayotgan ukrainalik harbiylardan ma’lumot olish imkoniga ega emas.