O‘zbekiston, Qozog‘iston va Qirg‘iziston birgalikda chigirtkalarga qarshi kurashadi

Evropa va O‘rtayer dengizi o‘simliklarni himoya qilish tashkiloti (EPPO) ishchi guruhining 55-yig‘ilishi doirasida Qozog‘iston nazorat qo‘mitasi raisi vazifasini bajaruvchi Saken Qanibekov O‘zbekiston va Qirg‘iziston fitosanitariya xizmatlari rahbarlari bilan uchrashuv o‘tkazildi. Muloqotning asosiy mavzusi chigirtkalarga qarshi himoya choralari bo‘ldi, deya xabar beradi xalqaro axborot agentligi Kazinform.

Unda ishtirokchilar mamlakatlarda mavsumiy hasharotlarga qarshi kurashish bo‘yicha samarali chora-tadbirlarni amalga oshirish bo‘yicha mavjud amaliyot bilan tanishtirilib, Locust.uz tizimi namoyish etildi. Bu chigirtka tuxum qo‘ygan hududlar, kimyoviy tozalash ishlari olib borilgan hududlar to‘g‘risidagi ma’lumotlarni qayd etuvchi elektron platforma bo‘lib, vaziyatni to‘g‘ri baholash imkonini beradi.

Tizim, shuningdek, transport vositalariga o‘rnatilgan GPS qurilmalari yordamida maxsus jihozlar harakatini kuzatib boradi. Bu vaziyatni o‘z vaqtida baholash va katta maydonlarda chigirtka tarqalishining oldini olish imkonini beradi.

Muzokaralar yakuni bo‘yicha tomonlar hamkorlikni yanada mustahkamlash, xalqaro fitosanitariya standartlarini joriy etish va axborot almashinuvini rivojlantirishga kelishib oldi.

Tomonlar chegara hududlarida chigirtkalarga qarshi kurashish, fitosanitariya holati, o‘rganish natijalari, zararli organizmlarning tarqalishi va ko‘rilgan choralar to‘g‘risida tezkor ma’lumotlar almashinuvini ta’minlash bo‘yicha hamkorlikka alohida e’tibor qaratadi. Shuningdek, fitosanitariya sertifikatlari to‘g‘risidagi ma’lumotlarni samarali va muntazam almashish uchun axborot tizimlarini birlashtirish ko‘zda tutilgan.

Qozog‘iston Qishloq xo‘jaligi vaziri o‘rinbosari Yermek Kenjexanuli Jibek Joly telekanalida ma’lum qilishicha, Qozog‘istonda 2 million gektargacha maydon chigirtka xavfi ostida.