Юқори малакали мутахассислар тайёрлаш йўлидаги долзарб ташаббуслар

Жорий йилнинг 30 январь куни мамлакатимиз президенти Шавкат Мирзиёев академиклар шаҳарчасида олимлар, ёш тадқиқотчилар, илмий-тадқиқот муассасалари раҳбарлари ва ишлаб чиқариш сектори вакиллари билан учрашув ўтказиб, унда илм-фан соҳасидаги энг муҳим вазифаларни муҳокама қилиш билан бир қаторда малакали мутахассислар тайёрлаш тизимини такомиллаштириш, йирик ишлаб чиқариш соҳаларини салоҳиятли кадрлар билан таъминлаш борасида муҳим таклиф ва тасвияларни илгари сурган эди.

Шу асосда “Ўзбекгидроэнерго” акциядорлик жамияти томонидан юртимизнинг нуфузли олийгоҳларидан бўлган Тошкент давлат техника университети, Тошкент архитектура-қурилиш институти ҳамда Тошкент иррригация ва қишлоқ хўжалигини механизациялаш муҳандислари институти билан ҳамкорлик алоқалари янада кучайтирилиб, давлатимиз раҳбарининг юксак салоҳиятли кадрлар тайёрлаш орқали иш унумдорлигини ошириш, мамлакат ривожига ҳисса қўшишга қаратилган талаблари ижросини сўзсиз таъминлаш мақсадида ушбу олий таълим муассасаларининг ўзига хос хусусиятларини эътиборга олган ҳолда алоҳида йўл хариталари шакллантирилди, зарурий чора-тадбирлар ижроси йўлга қўйилди.

Жумладан, Ўзбекистон Республикаси Президентининг 2020 йил 12 июндаги “2020/2021 ўқув йилида Ўзбекистон Республикасининг олий таълим муассасаларига ўқишга қабул қилишнинг давлат буюртмаси параметрлари тўғрисида”ги қарорига мувофиқ Жамият бошқаруви раиси ташаббуси ва бевосита саъй-ҳаракати билан Жамиятнинг малакали кадрларга бўлган эҳтиёжи юзасидан таклифлари инобатга олиниб, жорий ўқув йилидан бошлаб Тошкент давлат техника университетида Гидроэнергетика таълим йўналиши ташкил этилиб, мазкур йўналишда 5 нафар давлат гранти, 45 нафар контракт-тўлов асосида, жами 50 нафар талаба қабул қилиш режалаштирилди.

Тошкент архитектура-қурилиш институти Гидротехника иншоотлари қурилиши (турлари бўйича) таълим йўналишининг қабул квотаси 100 нафарга етказилди. Шундан, кундузги бўлимга 75 та (5та давлат гранти, 70 та тўлов-контракт асосида), сиртқи бўлимга 25 та (тўлов-контракт асосида) ўрин ажратилди. Жамиятнинг илмий-педагогик салоҳиятга эга малакали мутахассислари ҳамда олий таълим профессор-ўқитувчилари иштирокида ушбу йўналишларнинг бакалавриат ва магистратура босқичлари бўйича малака талаблари, ўқув режа ва фан дастурлари ишлаб чиқилди.

Шунингдек, янги қурилаётган гидроэлектрсанцияларда (“Зарчоб кичик ГЭС” – 20 ўрин, “Пском ГЭС” – 50 ўрин) талаба ўқитувчилардан тузиладиган қурилиш отрядлари учун зарурий шароитлар яратилмоқда. Ҳамкор университетларнинг тегишли факультетларида “Ўзбекгидроэнерго” АЖ бурчагини (соҳага оид 3D плакат, макет, инфокиоск, доимий видеороликлар тақдимоти) ташкил этиш ишлари олиб борилмоқда. Соҳавий кафедралар ҳамда ўқув-илмий лабораторияларини замонавий ўқув ва илмий жиҳозлар, ускуналар ва ўлчов асбоблари билан таъминлаш, “Ўзбекгидроэнерго” АЖ тасарруфидаги корхоналарда тегишли кафедралар филиалларини ташкил этиш  борасида ҳам муҳим ишлар олиб борилмоқда.

  Шу билан бир қаторда, ҳамкор олий таълим муассасалари талабалари ишлаб чиқариш амалиётини Жамият ҳузуридаги корхона ва ташкилотларда ўташи ҳамда зарурий меҳнат тажрибасига эга бўлиши учун ҳам чоралар кўрилмоқда. Хусусан, жорий йилнинг июль-август ойларида Тошкент ирригация ва қишлоқ хўжалигини механизациялаш институтининг соҳага хос ихтисосликлар бўйича мутахассислар тайёрлайдиган кафедралари талабалари “Самарқанд ГЭСлар каскади”, “Тошкент ГЭСлар каскади”, “Оҳангарон ГЭС” ва “Туябўғиз КГЭС” унитар корхоналарида  ишлаб чиқариш амалиётини ўтказиши белгиланган. Бўлғуси мутахассисларни иш жараёни билан яқиндан таништириш, ўз навбатида, уларда танлаган касблари бўйича аниқ тасаввур уйғотиш, мавжуд тушунча, билим, кўникма ва малакаларини такомиллаштириш имконини кенгайтиради.

Яна шуни алоҳида таъкидлаш жоизки, бугунги кунда “Ўзбекгидроэнерго” акциядорлик жамияти раиси ташаббуси билан олий таълим муассасаларининг соҳага алоқадор ихтисосликлар бўйича битирувчиларини Жамият қошидаги ишлаб чиқариш корхоналарига жалб қилиш борасида ҳам манзилли ва тизимли ишлар йўлга қўйилди. Бунда тегишли олий таълим муассасасини аъло баҳоларда якунлаган, иқтидорий салоҳиятга эга бўлган ватанпарвар ва фидойи ёшларни муносиб иш шароитлари билан таъминлаш, йўналтириш ва рағбатлантириш мақсадида уларни суҳбат ва тест асосида саралаб, Жамият ҳузуридаги “Ўқувэнергоқурилиш” нодавлат таълим муассасида  ўқув, ишлаб чиқариш корхоналарида эса амалий машғулотларга жалб қилиб, билим ва меҳнат тажрибаларини ошириш, шу асосда тизим корхоналарига ишга жойлаштириш бўйича махсус чора-тадбирлар ижро қилинмоқда.

Шу ўринда ушбу амалий ташаббуслар ҳамкор олий таълим муассасалари томонидан ниҳоятда хурсандчилик билан қабул қилинаётганини ҳам алоҳида эътироф этмоқ жоиз. Чунончи, Тошкент давлат техника университети Энергетика факультети декани, техника фанлари доктори Жавоҳир Тошев бу борада ўз мулоҳазаларини шундай баён қилади: “Ўтган 40 йиллар давомида университетимиз бирор бир ишлаб чиқариш тизими билан бу қадар самарадор ҳамкорликни йўлга қўймаган эди. “Ўзбекгидроэнерго” акциядорлик жамияти Бошқаруви раиси раҳбарлигидаги етук малакали кадрлар тайёрлаш йўналишида мутлақо янги шакл ва мазмундаги ҳамкорлик алоқалари амалий натижадорлиги билан аҳамиятлидир. Айниқса, Жамият томонидан таклиф этилган ёш битирувчиларни қайта тайёрлаш ва иш билан таъминлаш тизими  биз учун муҳим янгилик, муносиб эътибор бўлди.  Бу ташаббусларни муассасамиз битирувчилари ҳам кўтаринки руҳда қарши олишди. Эндиликда улар таҳсилни янада катта қизиқиш ва ишонч билан давом эттириб, ўз устларида  тинимсиз ишлашмоқда, келгуси меҳнат фаолиятларини аниқ ва манзилли режалаштиришмоқда. Биз, университетимиз номидан “Ўзбекгидроэнерго”  акциядорлик жамияти жамоасига чексиз миннатдорлик билдирамиз”.

Дарҳақиқат, бугун жадал суръатлар билан тараққий этиб бораётган фан-техника етук билим ва тафаккур соҳибларини тарбиялаш заруратини кун тартибига қўяди. Жаҳон ҳамжамиятидан муносиб ўрин эгаллаш, рақобатбардош маҳсулотлар ишлаб чиқариш, инновацион юксалиш учун ҳам замонавий билимларни эгаллаган, илмли ва масъулиятли кадрларга бўлган талаб ва эҳтиёж ҳамиша юқорилаб боради. “Ўзбекгидроэнерго” акциядорлик жамияти томонидан юксак малакали мутахассислар тайёрлаш, иқтидорий салоҳиятли ёшларни тарбиялаш ва  қўллаб-қувватлаш, ишлаб чиқариш соҳаларини кенгайтириш ва ривожлантириш борасида олиб борилаётган бу каби амалий ҳаракат ва ташаббуслар, ўз навбатида, юртимиз равнақи, халқимиз фаровонлигига ҳам сезиларли ҳисса қўшади.

Сурайё Пўлатова,

“Ўзбекгидроэнерго” АЖ Бошқаруви раисининг

маънавий-маърифий ишлар ва давлат тилини

ривожлантириш масалалари бўйича маслаҳатчиси