Йўлдаги эътиборсизлик икки ёш ҳаётига зомин бўлди

Тошкент шаҳри, Янгиҳаёт туманида содир бўлган даҳшатли йўл-транспорт ҳодисаси икки нафар ёш инсон ҳаётига нуқта қўйди. Тўй арафасида турган, келажак режалари билан яшаб турган унаштирилган ёшлар бир лаҳзалик бепарволик қурбонига айланди.

Судда кўриб чиқилган ушбу иш, нафақат, ҳуқуқий, балки оғир инсоний фожеа сифатида ҳам барчани ларзага солди.

Жорий йилнинг 9 январида Жиноят ишлари бўйича Сергели туман суди биносида 2025 йил 31 августига ўтар кечаси содир бўлган ҳодиса бўйича Тошкент шаҳар, Янги ҳаёт туман суди иши кўриб чиқилди. Ушбу муҳокама суд залида тўпланганларда оғир тассурот қолдирди. ЖИБ Янгиҳаёт туман суди судьяси Шерзод Амировнинг «Xabar.uz»га маълум қилишича, содир бўлган йўл-транспорт ҳодисаси икки нафар ёш инсон ҳаётига зомин бўлган. Суд ҳукми эса бу фожеанинг ҳуқуқий нуқтасини якунлаган.

Ҳолатга кўра, икки ёшнинг умр йўли бир лаҳзада узилган. Улар ҳаёт қуриш арафасида, тўй режалари, орзулар ва умидлар билан яшаб турган унаштирилган ёшлар эди. Бироқ, уларни манзилга қадар олиб кетаётган ҳайдовчининг машина бошқаришдаги бепарволиги, тезлиги ва руль ортидаги бир сониялик эътиборсизлиги икки ёшнинг келажагини ҳам, икки оиланинг бахтини ҳам йўқ қилди.

Тошкент шаҳри, Янгиҳаёт тумани, Қўрғонтепа кўчасида тунги соат 03:20 ларда содир бўлган навбатдаги автоҳалокат жуда оғир фожеа бўлди. «Cobalt» русумли автомашинани бошқариб келаётган 27 ёшли фуқаро Ж.М. аҳоли пунктларида белгиланган тезлик меъёридан анча ошиб, соатига 80-90 километр тезликда ҳаракатланган. У ҳаракат давомида автомашинаси салони олд ўриндиғи остига тушиб кетган телефонига чалғиган ва бошқарувни йўқотган. Автомашина йўлнинг ажратувчи бўлагида ўрнатилган темир-бетон устунга куч билан урилади. Жуда кучли ушбу зарба таъсирида олд ўриндиқда ўтирган фуқаро А. Ж. воқеа жойидаёқ, жон таслим қилган.

Суд-тиббий экспертизаси унинг танасидаги жароҳатларни қайд этди: бош, кўкрак ва қорин соҳаларида ўтмас қаттиқ зарбадан келиб чиққан оғир шикастлар, бош миянинг очиқ жароҳати, калла гумбази, асоси ва юз суякларининг бўлакланиб синиши, мия пардалари остига ва ён қоринчаларига қон қуйилиши, мия тўқимасининг эзилиши. Шу билан бирга, А.Ж. нинг ўпка, юрак ва жигари лат еган. Жигари ёрилган, қорин бўшлиғида ички қон кетиш кузатилган. Пешона, ияк ва ўнг қўл соҳалари эзилиб-йиртилган, бутун танасида кўплаб шилинмалар ва қонталашлар мавжуд бўлган. Экспертлар бундай жароҳатлар инсонда тирик қолиш имкониятини, деярли, қолдирмаслигини таъкидлади.

Суд ҳужжатларида қайт этилишича, автомашинанинг орқа ўриндиғида ўтирган қиз марҳум А.Ж.га унаштирилган М.И. бўлган. М.И. ҳаёт учун ўта хавфли аҳволда шифохонага етказилган. У беш кун давомида жонлантириш бўлимида ҳаёт учун курашди. Бироқ, унинг ҳам олган жароҳатлари ўта оғир эди: бош мияга қон қуйилиши, ўпка ва юрак лат ейиши, қовурғаларнинг синиши, елка ва икки оёқ сон суякларининг очиқ синиши, тананинг кўплаб жойларининг эзилиб-йиртилиши. Посттравматик шок ва ички аъзоларнинг шикастланиши оқибатида, М.И. ҳам орадан 5 кун ўтгач, вафот этган. Шу тариқа турмуш қуришни ният қилган икки ёш бир фожеанинг қурбони сифатида оламдан кўз юмди.

Суд жараёнида марҳумларнинг яқинлари бу фожеа, нафақат, фарзандларидан, балки, келажакдаги қудалик, неваралар, умидлардан ҳам маҳрум қилганини оғриқ билан сўзлашган. Шунингдек, жабрланувчиларнинг қонуний вакиллари, марҳумларнинг яқинлари судланувчи томонидан ҳодисадан сўнг на маънавий, на моддий ёрдам кўрсатилмаганини таъкидлаб, қонун доирасида қатъий чора кўришни сўрашган. Суд Ж.М.нинг бу хатти-ҳаракатларига ҳам ҳуқуқий баҳо берган.

Ж.М. судда айбига тўлиқ иқрор бўлиб, қилган ишидан пушаймон эканини айтди. Бироқ, суд қайд этганидек, инсон ҳаётига етган зарарни ҳеч қандай пушаймонлик орқага қайтара олмайди. Суд унинг ҳаракатларини Ўзбекистон Республикаси Жиноят кодексининг 266-моддаси 3-қисми «а» банди билан - транспорт ҳаракати хавфсизлиги қоидаларини бузиб, икки нафар инсон ўлимига сабаб бўлиш сифатида баҳолади.

Ж.М. 8 йил муддатга озодликдан маҳрум этилди. Шунингдек, 3 йилга транспорт воситасини бошқариш ҳуқуқидан маҳрум бўлди. Жазони манзил-колонияда ўташи белгиланди.

«Бу фожеа суд ҳукми билан якунланди, аммо йўқотилган икки ёш ҳаётни ҳеч қандай жазо ортига қайтара олмайди. Рул ортидаги ҳар бир инсон шуни англаши керакки, бир сониялик эътиборсизлик, айниқса телефонга чалғиш, бутун бошли оилалар тақдирига қора нуқта қўйиши мумкин. Йўл қоидалари — шунчаки талаб эмас, инсон ҳаётини асраш воситасидир»,-деди ЖИБ Янгиҳаёт туман судининг судьяси Шерзод Амиров.