Янги қонун тадбиркорлар учун янги имкониятлар эшигини очди
Бугунги кунда мамлакатимиз иқтисодиёти изчил ривожланишининг муҳим омили бу тадбиркорлик фаолияти бўлиб, жамиятимиз ижтимоий ва сиёсий барқарорлигининг кафолати ҳисобланади. Юртимизда иқтисодиётнинг ўсишини тезлаштириш мақсадида тадбиркорликка кенг йўл очилган бўлиб, кейинги йилларда тадбиркорлик йўналишига доир кўплаб норматив-ҳуқуқий ҳужжатлар қабул қилинди. Ушбу қабул қилинган ҳужжатлар соҳани янада ривожлантириш, тадбиркорлар ҳуқуқ ва манфаатларини ҳимоя қилишнинг мустаҳкам пойдевори бўлиб хизмат қилмоқда.
Жорий йилнинг 14 апрель кунидан қонуний кучга кирган “Тўловга қобилиятсизлик тўғрисида”ги Ўзбекистон Республикасининг қонуни ҳам тадбиркорлик субъектлари манфаатини кўзлаган бўлиб, бундан олдинги банкротлик муносабатларини тартибга солувчи “Банкротлик тўғрисида”ги қонундан тубдан фарқ қилган ҳолда иқтисодий ночор аҳволга тушиб қолган корхоналарга ўз фаолиятини қайта ташкил этиш ва тўлов қобилиятини тиклаш имконини беришни назарда тутади. “Банкротлик тўғрисида”ги қонун эса ўз номи билан корхонани банкрот деб топиш ва уни тугатишга қаратилган бўлиб, иқтисодиётни ривожланиши натижасида юзага келаётган янги муносабатларни тартибга солишни ўзида акс эттирмаган эди.
“Тўловга қобилиятсизлик тўғрисида”ги қонуннинг қабул қилинишидан мақсад иқтисодий жиҳатдан ночор ҳолатга келиб қолган тадбиркорлик субъектларини тугатиб юбориш эмас, балки уларни молиявий жиҳатдан соғломлаштириш билан бирга уларнинг фаолиятини қайта тиклашга йўналтирилганлиги билан алоҳида аҳамият касб этади.
Ушбу қонуннинг яна бир аҳамиятли жиҳати шундаки, корхонага нисбатан соғломлаштириш таомилларини қўллашни рағбатлантириш мақсадида мазкур жараёнда солиқ тўловларини тўхтатиб туриш, тижорат банклари ва молия институтларидан кредитларни жалб қилиш, қарздорлик қисман қопланганда эса корхона фаолиятини кредиторлар розилиги билан тиклаш тўғрисидаги нормаларнинг киритилганлигидир.
Мухтасар айтганда, халқимиз фаровон ҳаётини таъминлашда муҳим ўрин тутаётган тадбиркорликни давлат томонидан ҳар томонлама қўллаб-қувватланаётганлиги ҳақиқий бозор муносабатларидан таркиб топиб, ишбилармонлик муҳитининг яхшиланиб боришига кўмак бермоқда.
