Венгрия пойтахтида Наврўз байрами ва Ўзбекистон элчихонаси очилганининг бир йиллиги нишонланди
Ўзбекистон элчихонасида Наврўз байрами ва дипломатик миссия очилганининг бир йиллигига бағишлаган тадбир ташкил этилди, деб хабар беради "Дунё" АА мухбири.
Унда Венгрия расмий, ижтимоий-сиёсий, дипломатик, эксперт-таҳлил, бизнес ва илмий-академик доира вакиллари, шунингдек, ватандошлар иштирок этди.
Ўзбекистон элчиси Ойбек Шахавдинов йиғилганларга мамлакатимизда сўнгги йилларда эришилган ютуқлар, республикадаги туризм ва инвестиция имкониятлари ҳақида маълумот берди. Бизнес билан шуғулланиш, хорижий инвесторлар ва сайёҳлар учун яратилган қулай шарт-шароитларга урғу берилди.
Ўзбекистон ва Венгрия раҳбарларининг сиёсий иродаси туфайли мамлакатларимиз ва халқларимиз ўртасида стратегик шериклик руҳидаги муносабатлар мустаҳкамлангани қайд этилди. Шунингдек, иқтисодиёт, инвестициялар ва туризм соҳаларида икки томонлама ҳамкорликни янада ривожлантириш учун катта имкониятлар мавжудлиги билдирилди.
Тадбирнинг маданий қисмида "Ниҳол" мукофоти совриндорлари Ҳулкар Абдуллаева ва Вохиджон Исоқов иштирокида концерт дастури намойиш этилди.
Венгриянинг "Турон" жамғармаси президенти Андраш Биро:
– Ўзбекистоннинг Будапештдаги элчихонаси очилганининг бир йиллиги билан ўзбек томонини табриклайман. Бугунги тадбир жуда қизиқарли тарзда ўтди ва ҳамкорлик истиқболлари учун пойдевор бўлди. Яна бир марта барча ўзбек биродарларимизни самимий қутлайман.
"Haris Travel Club" сайёҳлик агентлиги бошқарувчи директори Рихард Харис:
– Ушбу имкониятдан фойдаланиб, Ўзбекистон элчихонасига Наврўз байрами ва дипломатик миссия очилганининг бир йиллигига бағишланган тадбирда иштирок этиш таклифи учун миннатдорлик билдираман. Ўзбекистоннинг бой маданий-тарихий мероси ва туризм салоҳияти ҳақидаги маълумотларни қизиқиш билан тингладим.
Венгрия ташқи ишлар ва савдо институтининг катта илмий ходими Шандор Шеремет:
– Ўзбек халқининг энг муҳим байрамларидан бири — Наврўзи олам тантаналарида иштирок этиш мен учун катта шараф. Бу йил Наврўз байрами Ўзбекистоннинг Венгриядаги элчихонаси ташкил этилганининг бир йиллигига тўғри келгани, айниқса қувонарлидир.
Этвош Лоранд университетида докторанти Ҳилола Ўролова:
– Мен Венгриянинг энг нуфузли университетларидан бири – Этвош Лоранд университетида докторантура босқичида ўқияпман. Ушбу дастур ўзбекистонлик ёш олимларга Венгрия университетларида ўқиш имкониятини тақдим қилди. Ўқиш давомида керакли касбни эгаллаш ва касбий маҳоратимизни ошириб баряпмиз. Буларнинг барчаси Ўзбекистон ва Венгрия ўртасида тез ривожланаётган дўстлик ва конструктив ҳамкорлик туфайли амалга ошди.
Будапешт техника ва иқтисодиёт фанлари университети талабаси Жавоҳир Норқулов:
– Бугун Ўзбекистон элчихонасида Наврўз байрами ва дипломатик ваколатхона ташкил этилганининг бир йиллиги муносабати билан бўлиб ўтган тадбирда қатнашдик. Ушбу мамлакатдаги Ўзбекистон ёшлари тадбирда фаол иштирок этишди. Фурсатдан фойдаланиб, хорижда таҳсил олаётган ватандошларни ҳар томонлама қўллаб-қувватлаётган Ўзбекистон ҳукуматига барча тенгдошларим номидан миннатдорлик билдираман.
