“Ўзстандарт” агентлиги: 14 турдаги импорт маҳсулотларининг сифати кафолатланмаган
Ўзбекистонга белгиланган меъёр талабларига номувофиқ, сифати кафолатланмаган маҳсулотларнинг кириб келиш ҳолатлари мавжуд. 2017-2018 йиллар даврида жисмоний ва юридик шахслардан “Ўзстандарт” агентлигига 277 дан ортиқ, Истеъмолчиларнинг ҳуқуқларини ҳимоя қилиш жамиятлари федерациясига эса 3 мингдан ортиқ маҳсулот сифати устидан шикоят мурожаатлари келиб тушди, деб хабар қилмоқда “Ўзстандарт” агентлиги матбуот хизмати.
52,5 млрд сўмлик маҳсулот талабларга жавоб бермаган
2018 йилда маҳсулотлар мувофиқлигини баҳолашда 52,5 млрд. сўм миқдордаги маҳсулотларнинг техник регламентлар талабларига ва импорт маҳсулот стандартларининг мажбурий талабларига номувофиқлиги аниқланган.
14 турдаги маҳсулот сифати кафолатланмаган
Жорий йилнинг ўтган даври мобайнида импорт маҳсулотлари синовлари жараёнида жами миқдори 2,9 млрд. сўм бўлган 14 турдаги маҳсулот бўйича 20 ҳолатларда белгиланган нормаларга номувофиқлиги аниқланган.
- Консерваланган нўхат – 320 млн.сўм,
- нок шарбати – 147 млн.сўм,
- автомобил шиналари – 500 млн.сўм (барчаси ХХР),
- палма ёғи – 692 млн.сўм (500 млн.-Қозоғистон ва 192 млн. Малайзия),
- писта ёғи – 376 млн.сўм (Россия),
- газ баллонлари – 148 млн.сўм (Арманистон) ва ҳ.к.
АҚШда 5 минг одам заҳарланишдан ўлган
Маълумот учун, Бутун жаҳон соғлиқни сақлаш ташкилоти маълумотларига кўра, ҳар йили ривожланган мамлакатларнинг деярли 30% аҳолиси озиқ-овқатдан заҳарланиш билан боғлиқ касалликлардан азият чекади. АҚШда ҳар йили озиқ-овқат билан боғлиқ 76 миллионга яқин касалланиш ҳолатлари қайд этилган. Улардан 325 минг ҳолатида шифохонага ётиш ва 5 минг ҳолатда ўлимга олиб келган.
