Ўзбекистонлик спорт курашчилар 2 та "Париж-2024" йўлланмасини қўлга киритди
Бугун, 24 сентябрь куни Сербия пойтахти Белград шаҳрида спорт курашлари бўйича катталар ўртасида давом этаётган жаҳон чемпионатида юнон-рум кураши усталари бир қатор вазнлардаги финал беллашувларида гиламга чиқади.
Мусобақанинг сўнгги кунида Ўзбекистон терма жамоаси аъзоси Жалгасбай Бердимуратов ўтиш босқичида Тони Мецомаки (Финляндия)/Жан Беленьюк (Украина) қарама-қаршилигида кечадиган баҳс ғолиби билан куч синашади. Токио Олимпиадаси иштирокчиси Бердимуратов мазкур беллашувда ғолиб чиқса, бронза медали учун курашни давом эттиради.
Кеча ўтказилган баҳсларда юнон рум курашчиларимиздан Исломжон Баҳромов 60 килограмм вазн тоифасида бронза медали ва "Париж-2024" ёзги Олимпиада ўйинлари йўлланмасини қўлга киритди. У ўтиш босқичида дастлаб, грузиялик Придон Абуладзени, бронза медали учун кечган баҳсда эса эронлик Меҳди Моҳсеннажедни мағлуб этди.
Айтиш лозим, Исломжон Баҳромов ушбу чемпионатда Олимпиада йўлланмасига эга чиққан учинчи курашчи бўлди. Бунгача Жавраил Шапиев ва Арам Варданян "Париж-2024" йўлланмасини қўлга киритган эди.
