Ўзбекистон ва Ҳиндистон таҳлил марказлари ўртасидаги ҳамкорлик фаоллашмоқда

Мамлакатимизнинг Деҳлидаги элчихонаси ва "NatStrat" нодавлат таҳлил маркази ҳамкорлигида Ўзбекистон-Ҳиндистон муносабатларининг бугунги ҳолати ва истиқболларига бағишланган давра суҳбати ташкил этилди, деб хабар қилмоқда "Дунё" АА мухбири.

Дипломатик миссия раҳбари Сардор Рустамбоев мамлакатимизда сўнгги йилларда ҳаётга татбиқ этилаётган кенг кўламли ислоҳотлар, инвестициявий ва тадбиркорлик фаолияти учун яратилган қулай муҳит, Ўзбекистон-Ҳиндистон серқирра алоқаларининг устувор йўналишлари ҳақида маълумот тақдим этди.

Ўзбекистон раҳбарияти томонидан олиб борилаётган очиқ ва прагматик ташқи сиёсат, айниқса, Марказий ва Жанубий Осиё халқлари ўртасидаги тарихий ўзаро боғлиқликни янада фаоллаштириш бўйича илгари сурилаётган муҳим ташаббуслар ва уларнинг натижаларига эътибор қаратилди. Минтақалараро муносабатларни янги босқичга олиб чиқишда Ўзбекистон ва Ҳиндистоннинг алоҳида ўрни таъкидланди.

Шунингдек, икки томонлама ҳамкорлик алоқалари сезиларли ривож топаётгани, савдо-иқтисодий муносабатлар мустаҳкамланаётгани, туризм оқими бир неча бор ошгани, илм-фан, технологиялар ва маданий-гуманитар йўналишларда янгидан янги лойиҳалар амалга оширилаётгани урғуланди. Ушбу натижалар салмоғини янада ошириш учун улкан салоҳият мавжудлиги қайд этилди.

"NatStrat" таҳлил маркази раҳбари, Ҳиндистоннинг Россия ва Бангладешдаги собиқ элчиси Панкаж Саран Ўзбекистон билан ҳамкорлик Ҳиндистон учун ўта муҳим аҳамиятга эга эканини, ўзаро муносабатлар салоҳияти юқорилиги ва ундан унумли фойдаланиш зарурлигини таъкидлади.

Савдо-иқтисодий ҳамкорлик кўламини кенгайтириш учун яратилган шароитларни янада такомиллаштириш зарурлиги, хусусан, замонавий транспорт-логистика йўлаклари барпо этиш бўйича биргаликдаги саъй-ҳаракатларни кучайтириш ҳақида фикр юритилди. Ушбу жараёнда икки мамлакат таҳлил марказлари ўртасидаги алоқаларни фаоллаштиришдан манфаатдорлик билдирилди.

– Ҳиндистон-Ўзбекистон ҳамкорлигининг салоҳияти жуда катта, – деди Панкаж Саран. – Ўзаро алоқаларимизнинг тарихи чуқур, лекин истиқболдаги муносабатларимиз учун ҳам катта салоҳият мавжуд. Ҳиндистон Ўзбекистон учун барқарор тараққиёт йўлида яқин ҳамкор, мамлакатингизда ишлаб чиқарилаётган маҳсулотлар учун катта бозор бўлиши мумкин. Ҳиндистон ва Ўзбекистон саноат, технологиялар, фармацевтика, тиббиёт, туризм ва бошқа йўналишларда истиқболли лойиҳаларни амалга ошириш имкониятига эга. Бугунги тадбирда икки мамлакат таҳлил марказларининг ушбу жараёндаги фаол иштироки масалаларига эътибор қаратдик.

Давра суҳбати иштирокчилари минтақавий ва халқаро аҳамиятга молик долзарб масалалар юзасидан ҳам фикр алмашдилар.