Украина Трампнинг президентлигидан қўрқмайди
![Украина Трампнинг президентлигидан қўрқмайди Украина Трампнинг президентлигидан қўрқмайди](/photos/news/URrVVMIgGxws8WS.jpeg)
Украина президенти девони раҳбари Андрей Ермак Россиянинг кенг кўламли босқинининг икки йиллигига бағишланган анжуман чоғида Украина АҚШнинг собиқ етакчиси Дональд Трампнинг янги президентлигидан қўрқмаслигини айтди.
Трамп шу йилнинг ноябрида бўлиб ўтадиган АҚШ президентлик сайловларида республикачилардан энг кўп номзод. АҚШ Конгрессидаги Трамп тарафдорлари Украинага молиявий ёрдам кўрсатувчи қонун қабул қилинишига тўсқинлик қилмоқда.
Трамп, шунингдек, агар у яна президент бўлса, «бу урушни бир кунда якунлашини» айтди. Унинг сўзларига кўра, бунинг учун у Украина президенти Владимир Зеленский ва Россия етакчиси Владимир Путин билан учрашади: «Уларнинг иккаласининг ҳам кучли ва заиф томонлари бор ва 24 соат ичида уруш барҳам топади, у тугайди». Зеленский ўз сўзларини изоҳлар экан, уларни «жуда хавфли» деб атади, чунки Трамп урушдан кейинги стсенарийни таклиф қилмаган.
Якшанба куни Ермак Трампнинг позицияси ўзгарган бўлиши мумкинлигини айтди.
«Президент [Зеленский] Трамп билан битта учрашув ўтказди, шахсий учрашув. Менимча, биринчидан, ўша пайтда Трамп қуршовида бўлган одамлар... Менимча, энди унинг янги жамоаси бор, шунинг учун ўша йилларда содир бўлган воқеалар ҳақида гапиришдан маъно йўқ», — деди Ермак.
«Сайлов кампаниясидаги риторика ва реал ҳаракатларни солиштирмаслик керак», - дея изоҳ берди Ермак Трампнинг сўзларига. — Биз АҚШ билан доимий алоқадамиз ва Америка халқи билан яхши муносабатларга эгамиз. Бизда икки партиянинг кучли ёрдами бор ва биз бу борада доимий ишлаяпмиз”.