Трикотаж маҳсулотлари ишлаб чиқариладиган корхонанинг экологияга таъсири қандай?
Экология, атроф-муҳитни муҳофаза қилиш ва иқлим ўзгариши вазирлиги Давлат экологик экспертизаси маркази ҳамда Тошкент шаҳар Экология бошқармаси Олмазор туман бўлими томонидан тумандаги “ZELAL TEKSTIL” масъулияти чекланган жамияти хорижий корхонаси фаолияти юзасидан мониторинг ўтказилди.
Мониторинг Ўзбекистон Республикаси Вазирлар Маҳкамасининг «Атроф-муҳитга таъсирни баҳолаш механизмларини янада такомиллаштириш тўғрисида»ги қарори 1-иловасининг 24-банди (асбест ва таркибида асбест бўлган буюмларни ишлаб чиқариш корхоналари) ижросини таъминлаш мақсадида амалга оширилди.
Ўрганиш жараёнида корхонада трикотаж маҳсулотларини ишлаб чиқаришда ҳосил бўладиган мато чанглари самарадорлиги юқори бўлган қўлқопли фильтрлар билан тозаланиши маълум бўлди. Шунингдек, технологик жараёнда ҳосил бўладиган оқова сувлар амалдаги биологик локал тозалаш иншооти орқали тозаланиши аниқланди.
Маълумот учун, бугунги кунда, “ZELAL TEKSTIL” хорижий корхонаси томонидан замонавий халқаро стандартларга жавоб берадиган локал сув тозалаш иншооти қурилмоқда. Бунда корхона ҳудудини кенгайтириш ва янги технологияларни жорий қилган ҳолда ишлаб чиқаришни ташкил қилишнинг атроф муҳитга таъсири тўғрисидаги баёноти лойиҳаси учун экспертиза хулосаси олинган. Ушбу локал сув тозалаш иншооти бир кунда 633,365 м3 оқова сувни тозалаш имконини беради.
