Трамп Путин ҳақида тушкун хулосага келди

АҚШ президенти Доналд Трамп Россия раҳбари Владимир Путинни Украинадаги урушни тўхтатишга кўндира олишига шубҳа қила бошлади. Бу ҳақда қатор Ғарб матбуот нашрлари ёзмоқда.

Сўнгги вақтларда Украинадаги урушни тўхтатиш борасида катта ваъдалар берган Трамп Путинни музокара орқали муроса йўлига сола олмаслигига кўзи етган кўринади.

Axios нашрига кўра, Оқ уй раҳбари ўз маслаҳатчиларига Путиннинг тинчлик музокаралари бўйича ният-мақсадини нотўғри баҳолаганини тан олган.

Трамп Украинада урушни тўхтатмаса, Россияга нисбатан жиддий чоралар кўрилишини айтиб келмоқда.

Куни кеча у Truth Social тармоғидаги расмий саҳифасида АҚШ Россияга қарши қақшатқич санкциялар жорий этишга тайёр экани, аммо бунинг учун НАТО давлатлари ҳам шундай чора кўриши ҳамда Россия нефтини сотиб олишни бас қилиши кераклиги ҳақида пост чоп этди.

“Бу Трампнинг эмас (мен президент бўлганимда бу уруш бошланмаган бўларди!), балки Байден ва Зеленскийнинг урушидир. Мен фақат уни тўхтатиш ва минглаб россиялик ҳамда украиналиклар ҳаётини сақлаб қолишга уринмоқдаман. (Биргина ўтган ҳафтада 7118 киши ўлди. Аҳмоқлик!) Агар НАТО мен айтгандек йўл тутса, уруш жуда тез якунланади ва одамлар ҳаёти сақлаб қолинади. Акс ҳолда, сиз менинг вақтимни, шунингдек, АҚШнинг вақти, энергияси ва пулини бекорга сарфлаган бўласиз”, – деб ёзган Трамп.

Трамп 14 сентябрь куни журналистлар билан учрашувда ҳам агар Европа АҚШ каби ҳаракат қилса, Россияга нисбатан санкцияларни кучайтиришини таъкидлади.

“Европа Россиядан нефть сотиб олмоқда. Мен улар нефть харид қилишини истамайман. Улар жорий этаётган санкциялар ҳам у қадар кескин эмас. Мен санкциялар жорий этмоқчиман, аммо улар ҳам менинг ҳаракатларимга мувофиқ равишда ўз санкцияларини кучайтириши керак”, – деган АҚШ раҳбари.

Президентлик сайлови даврида Россия – Украина урушини 24 соат ичида тугатишга ваъда берган Трамп Оқ уйга келганидан буён Путин билан бир неча бор телефонда суҳбатлашди.

Бунга ҳам қаноат қилмаган республикачи сиёсатчи жорий йил 15 август куни Путин билан Аляска штатида учрашди. Икки давлат раҳбари иштирокидаги қарийб 3 соатлик музокара амалий натижасиз якунланди. Украинада ўт очишни тўхтатиш борасида жиллақурса муваққат келишувга ҳам эришилмади.

Президент Трамп россиялик ҳамкасби билан музокарани ижобий баҳолади. У ҳатто Fox News телеканалига берган интервьюсида Путин билан учрашувга 10 баллик тизимда 10 балл қўйишини айтиб мақтанди. Аммо аксар таҳлилчилар Аляскадаги учрашув амалий натижа бермагани ҳолда Путинга катта очко келтирди деб ҳисоблайди. Умуман, Аляска саммити Оқ уйнинг мағлубияти, Кремлнинг ғалабаси ўлароқ талқин қилинди.

Трампнинг “Путин ақлдан озибди!”, “Путиндан ҳафсалам пир бўлди” қабилидаги огоҳлантиришлари эса Россия раҳбарига таъсир этмаётгани айтилмоқда.