Тошкентдаги мактабда форма сотиб олиш бўйича мажбурлов прокуратуранинг эмас, директорнинг иши бўлиб чиқди
Кеча, 2 август куни ижтимоий тармоқларда пойтахтдаги мактабларнинг бирида мактаб формаси сотиб олиниши шартлиги бўйича прокуратура ходимлари тилхат ёздирганлиги ҳақидаги хабар тарқалган эди.
Айни пайтда бош прокуратура матбуот хизматининг хабар беришича, мазкур хабарни ўрганиш юзасидан ишчи гуруҳ тузилиб, ўрганиш ишлари амалга оширилди.
Ўрганишда, Чилонзор туманидаги мактабларнинг бирида форма сотиб олиш бўйича прокуратура органлари томонидан ҳеч қандай тавсия берилмаганлиги ва тилхат олинмаганлиги, аслида бу мактаб директорининг шахсий ташаббуси эканлиги, бироқ бу жараёнга ёлғондан прокуратурани аралаштирганлиги аниқланган.
Ўрганиш натижасига кўра, келгусида бундай ҳолатларга йўл қўйилмаслик ҳақида мактаб директори расман огоҳлантирилди.
Эслатиб ўтамиз, жорий йил 27 июль куни АОКАда "2022-2023 ўқув йилида ягона мактаб формаси жорий этилиши" юзасидан ўтказилган брифингда Халқ таълими вазири Бахтиёр Саидов "Ягона мактаб формаси 2025 йилга қадар босқичма-босқич жорий этиб борилади. Яъни янги ўқув йили - 2022 йил сентябрь ойидан бошлаб ота-оналар ягона мактаб формасини харид қилишга мажбурий талаб қўйилмайди". - деб таъкидлади.
