Тошкентда спа-салонда қўшмачилик билан шуғулланган аёл жазоланди
Бугунги кунда айрим нопок кимсалар енгил пул топиш илинжида қўшмачилик қилиш ёки фоҳишахона сақлаш каби жирканч ишни ўзларига касб қилиб олиб, шунинг ортидан тирикчилик қилишни ўзларига эп кўрмоқдалар. Бундай ҳолатларга қарши курашиш мақсадида ҳуқуқни муҳофаза қилувчи органлар томонидан зарур тадбирлар амалга ошириб келинмоқда.
Иш ҳужжатларидан маълум бўлишича, 2000 йилда туғилган аёл Ш.Э. Тошкент шаҳрида “Соғломлаштириш маркази” СПА салон очиб, унинг ниқоби остида фоҳишахона ташкил этган ҳамда салонга келган фуқаролар ва ишчи қизлар ўртасида қўшмачилик қилиб, уларнинг ўзаро жинсий алоқа қилишлари учун шароит яратиб келган. Фуқаро мурожаатига кўра ўтказилган тезкор тадбирда бу ҳолат ўз исботини топган ва иш суд ҳукмига ҳавола этилган.
Жиноят ишлари бўйича Олмазор туман судида иш кўриб чиқилиб, судланувчи Ш.Э.га Жиноят кодексининг тегишли моддаларига мувофиқ 9 000 000 сўм жарима жазоси тайинланган ҳамда давлат фойдасига ундирилиши кўрсатилган.
Суднинг бу борадаги ижро ҳужжати 18.05.2023 йилда чиқарилган ва ижро қилиш учун Бюронинг Қўрғонтепа туман бўлимига юборилган.
Бўлим давлат ижрочиси томонидан суд ҳужжатининг ижросини таъминлаш мақсадида ижро ҳаракатлари олиб борилди ва жавобгар Ш.Э.дан давлат фойдасига 9 000 000 сўм миқдордаги жиноий жарима пуллари тўлиқ ундирилди.
