“Тоғ қўриқчиси” қишки ўқув курсида ҳарбийлар маҳорати

Юртимиз ҳудудининг 30 фоизини тоғлар ва тоғ олди кенгликлари ташкил этади. Тоғли шароитларда олиб бориладиган ҳар қандай жанговар ҳаракатларнинг муваффақияти кўпроқ шахсий таркибнинг жисмоний ва руҳий ҳолатига, қолаверса, уларда табиий қийинчиликларни енгиб ўтиш, юксак касбий тайёргарлик ҳамда экстремал шароитларни тўғри баҳолай олиш қобилиятига боғлиқ.

Шу боис ҳарбий хизматчиларнинг соҳага оид билим ва кўникмаларини ошириб бориш, маҳорат ва тажрибаларини  мустаҳкамлашга алоҳида эътибор қаратилмоқда.

Мудофаа вазирлиги тоғ тайёргарлиги ўқув машқ марказига Қуролли Кучлар барча тизимларининг ҳарбий хизматчилари, тоғ тайёргарлиги мутахассислари малака ошириш курсларига жалб этилади. Хусусан, “Фориш” тоғ дала полигонида Ўзбекистон Республикаси Мудофаа вазирлиги, Миллий гвардия ҳам Давлат хавфсизлик хизмати Чегара қўшинларининг мутахассислари учун “Тоғ қўриқчиси” қишки ўқув курси ташкил этилди.

Машғулотларни Мудофаа вазирлигининг тажрибали ҳарбий хизматчилари олиб борди. Марказий ҳарбий округнинг “Фориш” тоғ дала полигонида ўтказилган мазкур курсда асосий эътибор амалиётга қаратилди.

Тоғда ҳаракатланиш жараёнида шахсий ва гуруҳ анжомларидан ўринли фойдаланиш, тик қояларга чиқиб-тушиш, тор кўприклардан ўтиш, қоядан қояга арқонлар ёрдамида кўчиш, тоғ шароитида ярадорларни эвакуация қилиш амалиётларини кузатиш кишини ҳаяжонга солади. Бу ўғлонлар дастлаб ёзги ўқув курсида тобланди. Назарий ва амалий билимларини оширди. Бугун эса қиш фаслининг ноқулай об-ҳаво шароитларида тоғли ҳудудларда белгиланган мураккаб вазифаларни  бажаришди.

Ҳарбий хизматчилар реал тоғ шароитларида тоғ анжомлари ёрдамида қояга кўтарилиш ва тушиш, тоғли ҳудудда ҳаракатланиш, тоғ даралари ва тўсиқлардан ошиб ўтиш, ярадорга тиббий ёрдам кўрсатиш ва уни эвакуация қилишнинг замонавий усул ва услубларини амалда бажарди. Албатта, ҳарбий, тиббий тайёргарлик, яшовчанлик, тоғда махсус-тактика ва отиш тайёргарлиги, ҳарбий алпинизм... буларнинг барини пухта ўзлаштирган ҳарбий хизматчи ҳар қандай мураккаб вазифани бажаришда мувафаққиятга эришиши аниқ.

Мудофаа вазирлиги ҳарбий хизматчилари соҳанинг энг маъқул жиҳатларини миллий армиямизга тадбиқ этмоқда. Мазкур ўқув курси ҳам юрт ҳимоячиларининг тоғ тайёргалриги бўйича амалий кўникмаларини оширишда яна бир муҳим қадам бўлди.