Тошкент давлат техника университети талабаси нега 5 йилга қамалди? Расмий муносабат билдирилди

Тошкент давлат техника университети талабаси нега 5 йилга қамалди? Расмий муносабат билдирилди

2023 йил 30 январь куни жиноят ишлари бўйича Олмазор туман судининг очиқ суд мажлисида Жиноят кодексининг 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисмининг “г” банди айбланган С. Р. (2001 йил Тошкент шаҳрида туғилган, Тошкент давлат техника университети 4-курс талабаси, муқаддам судланмаган) га оид жиноят иши кўриб чиқилди. Бу ҳақда Тошкент шаҳар судлари хабар берди.

Маълум бўлишича, С. Р. динга бўлган қизиқишлари замирида ўзи фойдаланган телефон аппаратининг телеграм иловасидаги саҳифаси орқали “VK music bot” орқали кўчириб олинган ақидапарастлик ғоялари билан йўғирилган, мужоҳид бўлиш насиб қилгани, мужоҳид бўлиш ярашиши, мужоҳид бўлиб уларга эргашиш кераклиги, тоғутларга қарши курашда шаҳид бўлиш орзулари экани ҳақидаги ва бошқа мазмундаги аудиоқўшиқ (нашида) ни танишига тарқатиш мақсадида юбориб, интернет жаҳон ахборот тармоғидан фойдаланиб тарқатган.

Вазирлар Маҳкамаси ҳузуридаги Дин ишлари бўйича қўмита томонидан берилган 2022 йил 18 июлдаги ИП-1218-сонли хулосасига кўра, диний мазмундаги С. Р. тарқатган диний қўшиқ (нашида) ақидапарастлик ғояси билан йўғрилган бўлиб, бу каби диний материални мамлакатимиз ҳудудига олиб кириш, тайёрлаш ва тарқатиш тақиқланганлиги кўрсатилган.

Судланувчи суд мажлисида дастлабки тергов жараёнида қийноққа солинганлиги ҳақида кўрсатма бермаган ва важлар келтирмаган.

Жиноят кодексининг 244-1-моддаси 3-қисмида назарда тутилган жиноятни содир этганлик учун қонунда 5 йилдан 8 йилгача озодликдан маҳрум қилиш жазоси белгиланган. С. Р. га нисбатан Жиноят кодексининг 57-моддасини қўллаб, модда санкциясида назарда тутилган жазодан ҳам камроқ жазо тайинлаш учун асослар етарли бўлмаган. У 5 йилга озодликдан маҳрум этилди. Суд жазо тайинлашда қонунийлик, инсонпарварлик, одиллик ва жавобгарликнинг муқаррарлиги принципларига амал қилади.

Давлат айбловчисининг музокара нутқида қанча жазо муддати ёки қандай жазо тури сўраганлиги айбдор шахсга жазо тайинлашда муҳим омил ҳисобланмайди.

Биринчи инстанция судининг ҳукми қонуний кучга кирмаган бўлиб, ушбу ҳукмдан норози бўлган тақдирда апелляция шикояти (протести) қонунчиликда белгиланган тартиб ва муддатда берилиши мумкин.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!