Талабалар рейтинг дафтарчаси ва гуруҳ журналлари босқичма-босқич бекор қилинади
Ўзбекистонда 2021-2022 йилги ўқув йилидан ОТМларда талабалар рейтинг дафтарчаси, гуруҳ журналлари босқичма-босқич бекор қилинади. Бу ҳақда Олий ва ўрта махсус таълим вазирининг ахборот коммуникация технологияларини ривожлантириш бошқармаси бошлиғи Алишер Абдуллаев маълум қилди.
Алишер Абдуллаев олий таълим тизимида Рақамли университет лойиҳасини йўлга қўйиш кўзда тутилаётгани тўғрисида маълумот берди.
«Лойиҳа доирасида «Олий таълим жараёнларини бошқариш ахборот тизими» ишлаб чиқилди. Дастлабки босқичлар 2020-2021 ўқув йилида кредит-модул тизимига ўтказилган 46та олий таълим муассасасида жорий этилмоқда.
Мазкур ахборот тизимида ҳар бир талаба ўзининг шахсий кабинети орқали фанларнинг электрон ресурслари, дарс жадвали, назорат жадвали, давомати ва ўзлаштириши ҳақида маълумот олиши мумкин. Ушбу ахборот тизимини жорий қилиш орқали 2021-2022 ўқув йилидан бошлаб ОТМларда талабалар рейтинг дафтарчаси, гуруҳ журналлари босқичма-босқич бекор қилинади», дея унинг сўзларини келтирмоқда Kun.uz мухбири.
Бундан ташқари, рақамлаштириш дастурига кўра Муҳаммад ал-Хоразмий номидаги Тошкент ахборот технологиялари университетининг Тошкент вилояти филиали ва Гулистон давлат университетида ахборот технологиялари факултети ташкил қилинади.
