Таиландда ғорда қолиб кетган мактаб ўқувчилари ота-оналарига хат ёзди

Таиланд ҳарбий-денгиз кучлари сузувчилари гуруҳи ғорда қутқарув ишларини олиб бормоқда. Улар хатни суратга олиб ўзларининг Twitter’даги саҳифасига жойлади. Хат ҳар-хил дафтарлардан юлиб олинган 6 та қоғозга ёзилган. Болалар хатни 6 июнь, жума куни уларга ота-оналаридан хабар келтирган ҳарбий хизматчи орқали бериб юборган. Футболчиларнинг ёши 11—16 атрофида. Улар икки ҳафтадан буён ғорда чайла қуриб яшамоқда.

«Бизда ҳаммаси жойида, ҳамма соғ-саломат, хавотир олманг. Бу ердан чиққанимизда ҳар хил мазали овқатлар ейишни истаган бўлардик. Азиз ўқитувчилар, илтимос, ҳозирча бизга уй вазифалари бермай туринг», — дея болалар хатнинг биринчи бетида ёзган. Уларнинг ҳар бири ўзининг аҳволи ҳақида бир неча сатрлик ёзувлар қолдирган.

Хатда жамоа мураббийининг ҳам ёзганлари бор. Жамоатчиликнинг бир қисми мураббийни масъулиятсизликда айблаган. Айтишларича, мураббий кучли ёмғирлар мавсумида болаларни ғорга олиб бориб катта хато қилган. Ваҳоланки, бу мавсумда сув тошқинларининг рўй бериши одатий ҳолдир. Яна бир гуруҳ кишилар эса аксинча, мураббийни қаҳрамон деб атаган. Негаки айнан у туфайли болалар қоронғи ва сув босган ғорда 9 кун озиқ-овқатсиз яшашнинг уддасидан чиқмоқда.

«Бизни руҳан қўллаб-қувватлаб турганингиз учун раҳмат. Барча ота-оналардан мени кечиришларини илтимос қиламан. Шунингдек, сиздан рухсатсиз ғорга борган болаларингизни ҳам кечиришни сўрайман», — деб ёзган мураббий.

Ёш футболчилар мураббийси билан биргаликда велосипедда Таиланднинг энг шимолий нуқтасида жойлашган Тхам Луанг ғорига отланган. Улар 23 июнь куни шу атрофдаги стадионда машқ қилгандан сўнг ғорга борган. Авваллари улар қурғоқчилик мавсумида фавқулодда шароитда машқ қилиш ва жамоа руҳини кўтариш учун тез-тез ғорга келиб турган.

Ёш футболчилар кўп маротаба ғорнинг 7 километр чуқурликдаги ерларигача борган. Бироқ бу сафар болалар ғорга кирганидан бир неча соат ўтиб бошланган сел ер остида кутилмаган тошқинни келтириб чиқарган. Натижада ғордан чиқиш йўли ёпилиб қолган. Сув тошқинлари ғорда ҳар йили содир бўлади. Ғорга кириш жойида махсус тахтачага ёғингарчилик мавсумида, яъни июнь ойидан ноябргача бу ерга кириш тақиқланиши ёзилган.

Қидирув ишлари 24 июнга ўтар кечаси бошланган. Ғорга кириш жойида 11 та велосипед ва мураббийга тегишли мотоцикл топилган. Болалардан ҳеч қайси бири ота-онасига ғорга бориши ҳақида айтмаган.

Болалар ва мураббийни Таиланд ҳарбий-денгиз кучлари сузувчи ва кейв-дайверлари (чуқурликдаги ғорларга тушиш билан билан шуғулланадиган мутахассис) улар йўқолганининг 10-кунида топган. Улар ғорга кириш жойидан 5 километр узоқда қолиб кетган. Қутқарув ишларига минглаб кишилар жалб қилинган. Жараён деярли 2 ҳафтадан буён давом этмоқда. Яқин кунларда болаларни эвакуация қилиш ишлари бошланади. Болаларнинг аксарияти тоғли ҳудудда катта бўлгани учун сузишни билмайди. Бу ҳолат қутқарув ишларини мураккаблаштирмоқда.

6 июль, жума куни Таиланд ҳарбий-денгиз кучлари махсус бўлинмаси бошлиғи эвакуацияга тайёргарлик ишлари давом этаётгани ва тез орада болалар қутқарилишини маълум қилган. Айтилишича, кучли ёғингарчиликлар кутилмоқда. Улар туфайли ғор ичида сув янада кўпайиши табиий. Қолаверса, ғордаги ҳаво таркибининг ўзгариши кислород танқислигини келтириб чиқарган.