Собиқ транспорт вазири қимматбаҳо совғалар олгани учун бир йилга қамалди

Сингапурнинг собиқ транспорт вазири Субраманиам Исваран бизнесменлардан ноқонуний қимматбаҳо совғаларни қабул қилиш ва одил судловга тўсқинлик қилишда айбланиб, бир йиллик қамоқ жазосига ҳукм қилинди. Суд ҳукмни 3 октябрь куни чиқарди, дея хабар беради Reuters ва AP. Бу Сингапурда сўнгги 40 йил ичида вазир билан боғлиқ биринчи коррупция иши ҳисобланади.

62 ёшли Исваран 13 йил давомида Вазирлар Маҳкамаси ва Сингапурнинг етакчи сиёсий партияси — «Халқ ҳаракати» аъзоси бўлган. Аввалига собиқ вазирга 35 та банд бўйича айблов қўйилганди, бироқ кейинчалик прокурорлар уларни бештага қисқартирган. Тергов бошида ўзига қўйилган айбловларни рад этган сиёсатчи барча бандлар бўйича айбига иқрор бўлди.

Прокуратура Исваран учун олти ойдан етти ойгача қамоқ жазосини сўраган эди, бироқ судья Винсент Хунг собиқ вазир жиноятларининг оғирлиги ва уларнинг жамоатчилик ишончига таъсирини ҳисобга олиб, бу жазо «аниқ етарли эмас», деди.

«Давлат институтларига бўлган ишонч самарали бошқарувнинг асоси бўлиб, бу давлат хизматчисининг ҳалоллик ва жавобгарлик меъёрларидан пастлаши орқали осонликча бузилади», — деди у Исваранга ҳукм чиқарар экан.

Айблов хулосасига кўра, Исваран транспорт вазири бўлиб ишлаган вақтида ишбилармонлар, жумладан, малайзиялик миллиардер Онг Бенг Сенгдан совғалар қабул қилган. Совғаларга Премьер-лига футбол ўйинларига чипталар, Вест-Энд мюзикллари, «Формула 1» Гран-приси ва шахсий самолёт парвозлари киради. Уларнинг умумий қиймати 300 минг доллардан ортади.

Исваран билан боғлиқ иш ўзининг «бенуқсон тоза ҳукумати» билан фахрланадиган Сингапурни ҳайратда қолдирди, деб таъкидлади Reuters. Ўтган йили мамлакат Transparency International ташкилотининг коррупция индексида дунёда бешинчи ўринни эгаллаган эди. Сингапурлик вазирлар ҳам дунёдаги энг юқори маош оладиганлар қаторига киради, уларнинг ўртача йиллик маоши тахминан 834 минг долларни ташкил қилади. Бундай юқори маошлар амалдорларни пора олишдан қайтаришга қаратилган.

Сингапурда сўнгги марта 1986 йилда вазир коррупция бўйича тергов қилинган эди. Ўшанда миллий тараққиёт вазири Тэ Чеанг Ван гумонланувчи сифатида жалб қилинган ва айблов қўйилишидан аввал ўз жонига қасд қилган.