Ислом ҳамкорлик ташкилоти: Биз бу ҳолатни кескин қоралаймиз!..

Ислом ҳамкорлик ташкилоти (ИҲТ) Исроилнинг Сурияга қарашли ҳудудларни ишғол қилгани ва инфратузилма объектларига зарбалар берганини кескин қоралади.

Жорий йил 8 декабрь куни Сурияда Башар Асад ҳокимияти қулаб, ўзи Москвага қочганидан кейин Исроил қўшини Жўлон тепалигидаги қуролсизлантирилган зонани кесиб ўтиб Сурия ҳудудига бостириб кирди. Стратегик аҳамиятга эга Аш-Шайх тоғини эгаллади ва Қунейтра музофотидаги қишлоқларда коммендантлик соати жорий қилди.

ИҲТга кўра, Исроил бу ҳаракатлари билан БМТ резолюциялари ва халқаро ҳуқуқни жиддий равишда бузди.

Таъкидланишича, Суриянинг суверенитети ва ҳудудий яхлитлиги ҳурмат қилиниши ва барқарорлик сақланиши лозим.

«ИҲТ бош котибияти Сурия халқини қўллаб-қувватлайди ва унинг сиёсий танловини ҳурмат қилади. Биз мамлакатдаги барча сиёсий партияларни Сурия халқи манфаатларини ҳимоя қилиш борасида масъулиятни тан олишга чақирамиз. Сиёсий партияларни ҳукуматнинг ўтиш даври тинч ва хавфсиз шароитда, Сурия Араб Республикасининг ҳудудий яхлитлиги ва институтлари фаолияти кафолатланган тарзда кечишига даъват этамиз», – дейилади халқаро ташкилот баёнотида.

ИҲТ 1,7 миллиард аҳоли яшайдиган 57 та давлатни бирлаштирган дунёдаги энг йирик халқаро тузилмалардан биридир. Ўзбекистон мазкур халқаро ташкилотга 1996 йилда аъзо бўлган.

Аввал хабар берганимиздек, Дамашқда Асад ҳокимияти қулаши билан Исроил армияси Жўлон тепалиги оша Сурияга ҳудудига кирди.

Исроил Сурияга қарашли Жўлон тепалигини 1967 йили Олти кунлик уруш якунида босиб олган. 1974 йили Сурия ва Исроил ўртасида ҳарбий кучларни ажратишга доир битим имзоланиб, 400 квадрат км ҳудудда буфер зона ташкил этилган.

Асад режими қулаши ортидан Исроил бош вазири Бинямин Нетаняҳу Сурия билан 1974 йилда имзоланган битим ҳам ўз кучини йўқотганини иддао қилган ва ўз ҳарбийларига Сурия билан чегара ҳудуди ва уни назорат қилувчи позицияларни эгаллашни буюрган.

Исроил сўнгги кунларда Сурия бўйлаб авиазарбалар ҳам бермоқда.

Сурияда инсон ҳуқуқларини кузатиш маркази (SOHR) хабарига кўра, яҳудий армияси сўнгги 48 соат ичида Сурия ҳарбий салоҳиятини йўқ қилиш учун 250 га яқин авиазарба йўллаган. Ҳужумлар оқибатида Суриянинг турли музофотларидаги аэродромлар, тадқиқот марказлари, разведка, божхона ва радиоэлектроника бошқарув идоралари вайрон қилинган, қурол-яроғ омборлари, радар ва алоқа воситалари йўқ қилинган.

Тель-Авив иддаосича, ҳарбий объектлар ва қуроллар «мухолиф кучлар қўлига тушиши ва Исроилга таҳдид уйғотиши мумкин».

Таҳлилчилар эса Исроил вазиятдан фойдаланиб Сурияни янада заифлаштиришга уринмоқда деб ҳисоблайди.

Исроил ҳаво ҳужумлари орқали Сурия флотини ҳам яксон қилди.