"Снайпер блогер" Ички ишлар вазирлигининг лойиҳасими?
Kun.uz сайтида Снайпер блогер номли телеграм канали томонидан турли жамоатчилик фаоллари ва ОАВлар ҳақида туҳмат ва бўхтонлардан иборат нохолис маълумотлар тарқатилаётгани ҳақида хабар қилинди.
Шу ўринда Мухбир Далиев Kun.uz сайтида келтирилган маълумотлар ва фикрлар асосли бўлиш билан биргаликда анчадан бери кўпчиликни ҳам ташвишга солиб келаётганини билдиради. Бу каналда Мухбир Далиев билан биргаликда бошқа блогерлар Нурбек Алимов, Зафарбек Солижонов, Мубашшир Аҳмад, Файзбоғ, Элдар Асанов, Нозим Сафаров, Қобул Дўсовлар ҳақида ҳам турли уйдирмалар тарқатилиб, уларни ҳам обрўсизлантиришга уринишлар бўлган. Аноним дея кўринаётган ушбу бўхтон ва уйдирмалар билан шуғулланувчи канал ҳақида бизнинг ҳам ўз суриштирувларимиз мавжуд.
Маълумотларни очиқлайдиган бўлсак, Снайпер блогер канали ёлғиз эмас. Унинг бўхтон маълумотларини тарқатишга кўмаклашувчи ҳамтовоқлари ҳам бор. Ўрганишларимизга кўра, Снайпер блогер каналида эълон қилинган Мухбир Далиев ҳақидаги туҳмат постлар телеграм мессенджеридаги Инспектор.уз каналида ҳам тарқатилган. Мухбир Далиев ушбу канал эгаларининг кимлиги билан қизиқди. Олган маълумотларимиз янада қизиқ. Бу канални юритувчи эгаларидан бири Сайфуддин Тўрахўжаев бўлиб чиқди. Энг қизиқ томони шуки, ушбу шахс Ички ишлар вазирлигининг матбуот хизматида фаолият юритиши аниқланди. Бизда бу бўйича скриншотли маълумотлар ҳам мавжуд ва мутасаддиларга бу далилларни очиқлашга тайёрмиз.
Жамоатчилик орасида Президентнинг шаффофлик сиёсатини янада илгари сураётган, қонун устуворлигини таъминлашга ҳисса қўшаётган фаоллар, ОАВ вакиллари ва блогерларга нисбатан бўлаётган бу пасткашликлар бир гуруҳ қонунбузар кимсалар манфаати учун хизмат қилиши тайин.
ОАВ ва блогерларга нисбатан ўта оғир жиноятларни содир этганликда айблаб туҳмат қилинганлиги оддий ҳуқуқбузарлик эмас, балки Жиноят кодекси 139-моддаси 3-қисми "а" бандига асосан жиноий хатти-ҳаракатдир. Шундай экан бизнинг жамиятда бундай номақбул ҳаракатлар жавобсиз қолмаслиги керак. Биз жамоатчиликдан ушбу ғаразли хатти-ҳаракатларга бефарқ бўлмасликни сўраб қоламиз. Масала юзасидан Бош прокуратура ва Ички ишлар вазирлиги раҳбарияти томонидан эса чора кўрилишини талаб қиламиз. Биз бу иш доирасида расмий ариза билан мурожаат этамиз.
Хуршид Далиев,
журналист
