“Сеҳрландия”: “Ўргимчак одам” эмас — Жалолиддин, ёвузлик эмас — яхшилик, қўрқоқлик эмас — ишонч!

Яқин-яқингача хориж мультфильмларини кўриб, ҳавас қилардик. Бизникилар ҳам қачон шунақанги мультфильмлар ишларкин, дердик. “Сеҳрландия: қаҳрамонлик миссияси” мультфильми эса орзуларимизни рўёбга чиқарди.

Бугун Алишер Навоий номидаги киносаройда мазкур мультикартина премьераси бўлиб ўтди. Мультфильм Болалар контентини ривожлантириш маркази томонидан “Лола” анимация студияси томонидан тайёрланган. Асосий ғоя — болаларда эзгулик, қаҳрамонлик, халоскорлик туйғуларини шакллантириш, уларнинг онгига “Ўргимчак одам” ва бошқа шу каби ажнабий образлар ўрнига ўзимизнинг миллий қаҳрамонларни сингдириш. Бу албатта бизни “Қачонгача болаларимиз Ғарб қаҳрамонларига тақлид қилади, нима, ўзимизнинг миллий қаҳрамонлар йўқми?” деган азалий ва оғриқли саволдан қутқаради.

Мультфильмда сингилнинг акага муҳаббати, ғирромликнинг яхши оқибатларга олиб келмаслиги таъкидланган.

Мультфильмда қаҳрамонлар: Темур, Бобур, Улуғбек, Жалолиддин тўп ўйнаб, копток ортидан бошқа бир даврга тушиб қолишади. Ўз юртларига қайтишнинг ягона шарти — коптокни топиб, туйнук орқали қайтиш. Ўша даврда эса ёвуз қаҳрамонлар — йиртқиш қуш, ваҳший олабўжига дуч келишади. Коптокни олиб, портал орқали қайтмоқчи бўлганларида йиртқич қуш тош остида қолади. Қаҳрамонлар эса коптокни олиб, туйнук орқали ўз юртларига қайтишдан кўра ўзларига ёмонлик қилмоқчи бўлган қушга ёрдам беришади. Бу орқали эзгулик доим биринчи ўринда туриши таъкидланади. Эвазига тўп уларга қайтади ва уларга суперкуч берилади. Тўрт қаҳрамон ёвуз куч — Олабўжига қарши курашади.

Ёвуз қаҳрамонга қарши ёш болалар танланиши — улардаги эзгулик, инсонийлик энг катта куч эканлиги билан изоҳланади.

Айтганча, мультфильм ижодкорлари билан яна бир жабҳада фикримиз бир жойдан чиқди — роботлаштириш келажакда яхши оқибатларга олиб келмайди. Сунъий интеллектни пухта ўрганиб, тўғри фойдаланиш эса ҳар доим ёрдам беради.

Мультфильмда яхши деталь бор — қўрқоқ, ўзига ишонмайдиган Жалолиддин дўстларини қутқариш учун ўзига ишонган ҳолда Олабўжи ҳужумига нишон бўлади ва рақибни енгади. Яъни инсон қачонки ўзига ишонса, ҳар нарсага қодир бўлиши жуда яхши акс эттирилган. Якунда айнан Жалолиддин — мультфильмдаги энг қўрқоқ образ ўзига ишониб, Олабўжини йўқ қилади ва қаҳрамонга айланади. Мантиқий ва оригинал якун.

Яна бир гап: боболарингиз айтган эзгулик қаҳрамонларига, эртакларга ишонинг, чунки ҳар бир эртак ортида ҳақиқат бўлади.