Россияга 90 кундан ортиқ муддатга борадиганлар тиббий текширувдан ўтади
РИА “Новости”нинг хабар беришича, Россияга 90 кундан ортиқ муддатга келган меҳнат муҳожирлари ва чет элликлар ОИВ, гиёҳванд моддалар ва бир қатор юқумли касалликлар бўйича тестлардан ўтишлари шарт. Берилган тиббий маълумотнома бир йил давомида амал қилади, кейин яна тест топшириш керак бўлади. Тегишли федерал қонун 2021 йил 29 декабрда кучга кирди.
“Ушбу хорижий фуқаролар Россия Федерацияси томонидан тан олинган шахсни тасдиқловчи ҳужжат, шунингдек, одамнинг иммунитет танқислиги вируси (ОИВ) келтириб чиқарадиган касаллик йўқлиги тўғрисидаги сертификат ва мазкур модданинг 18-бандида кўзда тутилган тиббий кўрикдан ўтганлигини тасдиқловчи бошқа ҳужжатларни тақдим этади”, – дейилади ҳужжатда.
Ушбу талаблар Россияга 90 кундан ортиқ муддатга келган ва мамлакатда ишлашни режалаштирмаган чет элликларга, шунингдек, Россия Федерациясига меҳнат фаолиятини амалга ошириш учун келганларга тегишли.
Бу тоифадаги хорижликлар ушбу тиббий кўриклардан ўтганликларини тасдиқловчи тиббий ҳужжатларнинг амал қилиш муддати тугаганидан кейин 30 кун ўтгач, яна тестлардан ўтишлари керак бўлади.
