Қорақалпоғистонда аёл эрига жаҳл қилиб 5 ёшли қизини болта билан жароҳатлади

Aмударё туманининг чекка овулларидан бирида истиқомат қилувчи аёл турмуш ўртоғи “сен билан яшамайман, менга сендай аёл керак эмас”, деб уйидан онасикинига кетиб қолганига жаҳл қилиб, алам устида ўз яшаш хонадонида беш яшар вояга етмаган қизининг бош қисмига бир неча марта болға билан урган. Сўнг қўлига пичоқ олиб бош ва ўнг бармоқ қисмларига бир неча марта қасддан уриб, қизалоққа оғир шикаст етказган. Бу ҳақда "Замон" инфармацион дастури лавҳа тайёрлаган.

Мазкур ҳолат юзасидан тайинланган суд тиббий экспертизасининг хулосасига кўра, қизалоқда бошнинг жароҳати, бош мия ёпиқ жароҳати, мия силжиши, бош суяги ўйилган жароҳати, бўйин орқа томон суяклари синиши, пешона жароҳати, ўнг қўл 3-4 бармоқлар синиши, ўнг қўл 4-бармоқнинг тирноғи тушиши, бўйиннинг орқа томони шилинган жароҳатлари аниқланган.

Туман Тиббиёт бирлашмаси шифокорларининг кўрсатган тиббий ёрдамлари туфайли қизалоқ омон  қолди. 

 Жиноят ишлари бўйича туман судида ана  шу жиноятни содир этган бераҳм аёлнинг иши муҳокама этилди. Эҳтиёт чораси  сифатида қамоқда сақланаётган аёлга қилмишига яраша жазо тайинланди.