Президент Паралимпия чемпионлари билан телефон орқали суҳбатлашди

Президент Шавкат Мирзиёев Франция пойтахти Париж шаҳрида ўтаётган Паралимпия ўйинларида терма жамоамизнинг ҳисобидаги олтин медаллар сонини бештага етказган енгил атлетикачилар Элбек Султонов, Ёрқинбек Одилов ва таэквондочимиз Асадбек Тоштемиров билан телефон орқали суҳбатлашди. Бу ҳақда президент матбуот хизмати хабар берди.

Президент ўз номидан ва барча юртдошлар номидан спортчиларни самимий қутлаб, бу зафарлар энг азиз, энг улуғ байрам – Мустақиллик кунига муносиб совға бўлганини айтди. Элбек Султонов ядро улоқтириш баҳсларида 16.45 метр натижа қайд этиб, олтин медални қўлга киритди.

Байрамларимиз байрамларга уланяпти. Юртимизга учинчи олтин медални тўлдирганинг учун чин қалбимдан табриклайман. Ядро улоқтириш баҳсларидаги финалда тажрибали рақибларингдан тўла устун келиб, ишончли ғалаба қозондинг. Шахсий рекордингни ҳам янгиладинг, бутун дунё бунга тан берди.

Ўтган йили Париждаги жаҳон чемпионатида учинчи ўрин эгаллаган эдинг, шундай серғайрат, баҳодир ўғилларимга зафар ҳар доим ёр бўлсин. Мустақиллигимиз байрамига бу жуда катта туҳфа бўлди, деди президент Элбек Султонов билан суҳбатда.

Енгил атлетикачи Шавкат Мирзиёевга ишонч ва табрик учун миннатдорлик билдирди.

Кеча мусобақа жараёнида иккита украиналик рақибларим ҳам мендан ўзиб кетишди. Шунда мураббийим ўз олдиларига чақириб, сизни айтган гапларингизнинг ҳаммасини менга етказди. Бу менга куч бўлди. Тўртинчи уринишда 16.45 натижани амалга ошириб, олтин медални қўлга киритдим, деди Султонов.

Президент уларнинг мураббийлари ва ота-онасига миннатдорлик билдириб, кеча совриндор бўлган спортчиларимизга ҳам салом ва табрик сўзларини йўллади.

Паралимпия ва Олимпия натижаларини кўриб, жуда кўп ёшлар спортга қизиқишди. Ота-оналар спорт мактабларига болаларини олиб келишни бошлади. Бу ҳам мен қилаётган ҳаракатларимдан бири. Агар сизлар йўлбошчи бўлиб, ҳаракат қилсаларинг, натижа биз кутгандай бўлади, деди Шавкат Мирзиёев.

Ёрқинбек Одилов найза улоқтириш баҳсларида 50,32 метр натижани қайд этиб, олтин медални қўлга киритди.

Ўтган йили Париж шаҳрида Жаҳон чемпионатида ва Хитойнинг Ханчжоу шаҳрида Пара Осиё ўйинларида кумуш медални олган эдинг. Бу гал 170 давлат ичида найза улоқтириш бўйича Паралимпия ўйинларининг мутлақ етакчиси эканингни яққол исботладинг. Ғурурланаман, ифтихоримсан, фарзандим. Яна бир марта ўзбек ёшлари қандай буюк ишларга қодирлиги, буюк аждодларимизга муносиб ворис эканингни кўрсатдинг, деди президент Ёрқинбек Одиловга.

Шунингдек, Шавкат Мирзиёев спортчилар “Америкада ҳам олтинларни шода-шода олиб келишларига ишонч билдирди”, Одилов юқори натижаларни қўлга киритишга ваъда берди.

Таэквондочи Асадбек Тоштемиров Паралимпия ўйинларида барча рақибларини йирик ҳисобда мағлуб этиб, олтин медални қўлга киритди.

“Ярим тунда халқимизга навбатдаги олтинни совға қилдинг. Таэквондо бўйича ўз вазнингда дунёда тенгсиз эканингни яна бир карра исботладинг. Ўтган йилги Мексикада ўтказилган Жаҳон чемпионатида олтин медални қўлга киритганда Париждаги Паралимпияда ҳам албатта ғолиб бўламан деган ваъдангни бажардинг.

Бу мен, халқимиз ва айниқса ёшлар учун ғурур ва ифтихор. Тажрибали рақибингни йирик ҳисобда — 37:17 ютдинг. Биз ҳаяжон билан кўрдик, ҳали ёшсан, эндигина 22 га тўлдинг. Келгусида оғир вазнга ўтмоқчи эканингдан ҳам хабарим бор. Келгусида катта-катта шоҳ супаларда сени кўриш насиб қилсин”, деди президент.

Асадбек Тоштемиров яратилган шароит, президентдан эшитган байрам табриги ва ишончи учун ҳам миннатдорлик билдирди.