Президент COVID-19’га қарши эмлаш бепул бўлишини айтди
Аргентинада коронавирус инфекциясига қарши Россиянинг «Спутник V» вакцинаси билан эмлаш бепул амалга оширилади. Мамлакат президенти вакцинани иложи борича тезроқ олиб келиш бўйича топшириқ берган. Бу ҳақда президент ёрдамчиси Сесилия Никколини маълум қилди.
«Президент вакцинани иложи борича қисқа вақтда қўлга киритиш юзасидан барча чораларни кўриш масъулиятини ўз зиммасига олди», – деган давлат раҳбари ёрдамчиси El Destape радиосига берган интервьюсида.
«Вакцина бепул бўлади. «Спутник V»нинг нархи 19,9 АҚШ доллари, лекин у ҳамма учун бепул бўлади. Мамлакат аҳолиси текинга эмланиши мумкин», – дея қўшимча қилган Никколини.
Шунингдек, у коронавирусга қарши вакцинация қилиш Аргентина тарихидаги энг катта кампанияларда бири бўлишини қайд этган. Мамлакат фақат Россия билан вакцина сотиб олиш бўйича музокаралар олиб бораётгани йўқ, Аргентина AstraZeneca ва Pfizer компаниялари билан ҳам келишишга уринмоқда.
