Пойтахт кўчаларидаги қурилиш сабабли 500 дан ортиқ дарахт кўчирилиши мумкин
Тошкент шаҳар Экология, атроф-муҳитни муҳофаза қилиш ва иқлим ўзгариши бошқармасига “Кўприк қурилиш” акциядорлик жамияти томонидан Яккасарой тумани ҳудудидаги Бобур кўчасини Ислом Каримов номидаги Тошкент халқаро аэропорти билан боғлайдиган ҳамда С.Толипов кўчасига туташ йўл ўтказгичлар қурилиши лойиҳаси доирасида дарахтларни кўчириш масаласи юзасидан мурожаат келиб тушди.
Қайд этилишича, йўл ўтказгич суткасига 36 мингта автомобиль ўтказиш қувватига эга бўлиб, амалда соатига 1 минг 500 та автомобиль ҳаракати учун хизмат кўрсатиши айтилди. Қурилаётган йўл ўтказгич эса соатига 6 мингта автомобиль ўтказа олиши, яъни суткасига 144 мингта автомобиль ҳаракатини таъминлай олиши таъкидланди. Бу эса тирбандликнинг олдини олади ҳамда ҳавога чиқадиган чиқинди газларини 4 баробаргача камайтиради. Мазкур лойиҳанинг биринчи босқичи 2023 йилнинг ноябрь ойида якунланиши ва йўл ҳаракати қисман йўлга қўйилиши кўзда тутилган.
Маълумотларга кўра, дастлаб 1,4 мингта дарахт ва буталарни кўчириш режалаштирилган. Чунки лойиҳа хиёбон ҳудудининг бир қисмини ҳам ўз ичига олган. Лойиҳа дизайни ўзгаргач эса кўчирилиши керак бўлган дарахтлар сони камайган. Айни дамда биринчи босқичда 69 та дарахтни кўчириш режалаштирилган, жами эса 500 дан ортиқ дарахт кўчирилиши мумкин. Ҳар бир кўчирилган дарахт уч йил давомида парвариш қилинади.
Ўзбекистон Республикаси Экология, атроф-муҳитни моҳофаза қилиш ва иқлим ўзгариши вазирлиги матбуот хизматининг маълумотига кўра, мурожаат атрофлича ўрганиб чиқилади.
