Парижда пенсия ислоҳотига қарши 100 дан ортиқ намойишчи ҳибсга олинди
Душанба куни Парижда пенсия ислоҳотига қарши уюштирилган намойишларда 113 киши ҳибсга олинди. Бу ҳақда BFM телеканали маълум қилди.
Энг оммавий намойишлардан бири Парижнинг 7-округидаги Вобан майдонида бўлиб ўтди. Манбанинг хабарига кўра, бир неча минг киши майдонга йиғилиб, пенсия ислоҳотини бекор қилишни талаб қилиб, ҳукуматнинг тегишли қонун лойиҳасини парламентни четлаб ўтиб ўтказиш қарорига норозилигини билдирган. Мухолифатнинг ҳукуматга ишончсизлик ҳақидаги иккита резолюцияси парламентнинг Миллий ассамблеясида (қуйи палатаси) етарлича овоз ололмаганидан сўнг, айрим намойишчилар чиқинди қутиларини ёқиб, полиция билан тўқнаш келишди. Ҳуқуқ-тартибот ходимлари кўздан ёш оқизувчи газ ишлатган ва намойишчиларни майдонга киришини тўхтатган.
Бир неча соат ўтгач, намойишчиларга Вобанни тарк этишга рухсат берилди, уларнинг баъзилари Сент-Лазар станцияси ва Париж операси ҳудудига боришди. Полиция ҳудудда катта намойишни тўхтатди, аммо намойишчилар кичик гуруҳларга бўлиниб, шаҳар бўйлаб ахлат қутиларини ёқишда давом этмоқда. Кўпгина кўчаларда ахлатчиларнинг иш ташлаши туфайли тўпланган катта чиқиндилар ҳали ҳам мавжуд.
