«Париж-2024» даги йўлланмаларимиз сони 18 тага етди
Доҳада сув спорт турлари бўйича ўтаётган жаҳон чемпионатида спортчимиз «Париж-2024» ёзги Олимпия ўйинлари йўлланмасини қўлга киритди.
Бу эса Ўзбекистон спорт делегациясининг ёзги Олимпия ўйинларидаги йўлланмалари сонини 18 тага етишини таъминлади.
Бугун, 10 февраль куни Қатар пойтахтида сув спорт турлари бўйича давом этаётган жаҳон чемпионати баҳсларининг сувга сакраш йўналишида терма жамоамиз аъзоси Игорь Мялин 10 метр баландликдан сувга сакраш мусобақасида иштирок этди.
Ярим финал мусобақасида Игорнинг чиқиши 415.80 балл билан баҳоланди ва спортчимиз ҳал қилувчи финал босқичига чиққан 12 нафар спортчи орасида 7-натижага эришди.
Чемпионат дастурига кўра, 10 метр баландликдан сувга сакраш мусобақасида финал босқичига чиққан 12 нафар спортчи “Париж-2024” олимпия ўйинлари йўлланмасига сазовор бўлади.
Жаҳон чемпионатининг финал мусобақасида медаллар учун курашни давом эттирадиган ҳамюртимиз Игорь Мялин бир вақтнинг ўзида Олимпия ўйинларига йўлланмани ҳам қўлга киритгани аҳамиятли бўлди.
Эслатиб ўтамиз, чемпионатнинг эртанги сузиш дастурида терма жамоамиз аъзоларидан Илья Сибирцев ва Элдорбек Усмонов баҳсларга киришади.
