Озарбайжонда рақамли шахсий гувоҳнома жорий қилинади
Озарбайжон жаҳон тенденцияси билан бирга ривожланмоқда. Энди мамлакат фуқаролари муҳим ҳужжатларни бевосита смартфонда олиб юриши мумкин. Республика Президенти давлатнинг Оила кодексига, шунингдек шахсни тасдиқловчи гувоҳнома, шахсий маълумот ва ахборотни ҳимоя қилиш билан боғлиқ бир неча қонунга ўзгариш киритиш тўғрисидаги фармонни имзолади.
Ушбу ҳужжатга мувофиқ, шахсни тасдиқловчи гувоҳномадаги маълумот энди Озарбайжон инновация ва рақамли ривожланиш агентлиги томонидан ишлаб чиқилган электрон ҳукумат ахборот тизими – mygov орқали олиниши ва тақдим этилиши мумкин. Шу тарзда тақдим этилган маълумотлар ID’ни тўғридан-тўғри тақдим этишга тенглаштирилади. Бу жисмоний идентификаторни олиб юриш энди мажбурий бўлмаслигини англатади.
Бундан ташқари айни иловада фуқаро шахсий маълумотни қачон, қаерга, қайси тузилмага жўнатганини қайд қилиб бориши мумкин. Корхоналар учун ушбу янгилик хизмат тақдим ини етказиб беришни соддалаштириш ва тезлаштириш, шунингдек босма амалиёт ва қоғоз харажатини камайтириш имконини беради.
Рақамли шаклда маълумот тақдим этилиши мумкин бўлган ҳужжатлар сирасига никоҳ, туғилганлик ва ўлим тўғрисидаги гувоҳнома киради. Озарбайжон жамиятини рақамли ўзгартиришга қаратилган навбатдаги платформага янги функциялар қўшилиши қатор ташаббусларни қамраб олган.
Фармонда кўрсатилишича, 140 дан зиёд рақамли хизматга ягона кириш тизими яратилади, давлат идоралари ўртасида маълумот алмашинувини такомиллаштириш мақсадида рақамлаштиришга алоҳида эътибор берилади. Умумий RSD қуйи тизими орқали давлат органларида электрон ҳужжат айланиши тизимлаштирилади. Шунингдек, рақамли трансформацияни ривожлантириш дастури – Chief Digital Transformation Officer (CDTO) доирасида давлат хизматчиларига рақамли трансформациянинг амалий воситалари ва самарали усулларини ўргатиш бўйича тренинглар уюштирилади.
Янги очиладиган Озарбайжон Кибер хавфсизлик марказида талабалар тадқиқот олиб бориши, жамият фаол рақамли ривожланиши билан боғлиқ хавфни камайтиришга ёрдам берувчи инновацион ечимлар ишлаб чиқиши кўзда тутилган.
Эслатиб ўтамиз, 2022 йил Ўзбекистонда ҳам шахсни тасдиқлашнинг янги модули – Mobile-ID синов тартибида ишга туширилган. Мазкур тизим ёрдамида фуқаролар доимо ёнида олиб юрувчи мобил телефони рақами орқали рўйхатдан ўтиб, ҳар қандай давлат хизматидан электрон рақамли имзосиз фойдаланиши мумкин.
