Оқ уй: Франция АҚШга раҳмат айтсин!..

Оқ уй матбуот котиби Кэролайн Левитт француз депутатининг “Озодлик” ҳайкалини ортга қайтариш хусусидаги талабига жавоб қайтарди.

Президент Трампнинг матбуот котибига кўра, ҳайкални Франция АҚШ халқига совға ўлароқ берган ва Вашингтон уни қайтариш талабини рад этади.

“Қуйи даражадаги исмсиз француз сиёсатчисига маслаҳатим шуки, АҚШ шарофати билангина французлар ҳозирда немис тилида сўзлашмаётгани фактини унутманг. Шу сабаб улар бизнинг мамлакатга раҳмат айтишлари керак”, – деган К.Левитт.

Европа парламенти депутатини “қуйи даражадаги исмсиз француз сиёсатчиси” дея атайин ерга урган Оқ уй матбуот котиби ўз баёноти билан Иккинчи жаҳон уруши даврида АҚШ Францияга кўмак кўрсатганига шама қилган.

Эслатиб ўтамиз, Европа парламентининг франциялик аъзоси Рафаэль Глюксманн АҚШнинг ҳозирги сиёсати ҳамда Доналд Трамп маъмуриятининг қарорлари мамлакатнинг озодлик қадриятларига содиқ эмаслигини кўрсатаётгани учун Вашингтон “Озодлик” ҳайкалини Парижга қайтариши кераклигини таъкидлаганди.

Америка раҳбариятининг “мустабидларнинг ёнини олаётгани” ҳам француз сиёсатчисига хуш келмаган.

Маълумот учун, француз ҳайкалтароши Август Бартолди томонидан ишланган ва АҚШ халқига туҳфа сифатида юборилган “Озодлик” ҳайкали 1886 йил 28 октябрда Америка Мустақиллик декларациясининг 100 йиллиги муносабати билан Нью-Йоркда ўрнатилган эди.

Дипломатик майдондаги даҳанаки тортишув Трамп маъмурияти Европа Иттифоқи давлатларига қарши бож уруши очган даврга тўғри келмоқда.

12 мартдан бошлаб Оқ уй ЕИдан келтирилаётган пўлат ва алюминийга 25 фоизлик бож жорий этди. Брюссель бунга жавоб чоралари ваъда қилган.

Аввал хабар берганимиздек, АҚШ вице-президенти Жей Ди Вэнснинг жорий йил 14 февраль куни хавфсизлик бўйича Мюнхен анжуманида Европа етакчиларига ёш боладек дарс ўтишга урингани ҳам уларни дарғазаб қилган эди.

Трамп маъмурияти ҳокимиятга келгач, Вашингтоннинг Европа давлатлари билан Украина борасида ҳам якдиллиги йўқолган. Сўнгги ҳодисалар Россия билан музокараларга зўр бераётган Оқ уй бу жараёнга Европа Иттифоқини қўшишни истамаётганини кўрсатмоқда.

“Кўҳна қитъа”даги айрим сиёсатчилар Вашингтон Украина масаласида Москвага ён беришга уринаётганини хиёнат деб баҳолаган.