Навоийда 43 км пулли йўл қурилади

Навоийда 43 км пулли йўл қурилади

Янги пулли йўл вилоят ҳудудидан ўтган М-37 “Самарқанд-Бухоро-Туркманбоши” автомобил йўлига параллел равишда қурилиши кўзда тутилмоқда. Навоий вилояти ҳокими Нормат Турсунов Хитойга ташрифи чоғида ушбу давлат инвесторлари билан вилоятда пулли йўл қуриш бўйича дастлабки келишувга эришган.

Навоий вилоятида пулли йўл қурилиши режалаштирилмоқда. Бу ҳақда Kun.uz’га вилоят ҳокимлиги матбуот хизмати хабар берди. Маълум қилинишича, вилоят ҳокими Нормат Турсунов раҳбарлигидаги делегация Хитой Халқ Республикасида бўлиб қайтган. Ташриф чоғида икки томонлама манфаатли бўлган бир қанча келишувларга эришилган.

Жумладан, Хитойнинг Сиан шаҳрида Навоий-Сиан ҳудудлари ўртасида инвестициялар, саноат ва савдо ҳамкорлигига бағишланган ишбилармон доира вакиллари учрашуви ўтказилган. Унда Сиан шаҳри ишбилармон доира вакилларига вилоятнинг инвестицион ва саноат салоҳияти, вилоятда замонавий турар жой мажмуалари ва автомобил йўллари қурилишининг истиқболлари ҳамда вилоятнинг драйвер соҳалари ҳисобланган кимё, қурилиш материаллари, электротехника, текстил ва бошқа саноат тармоқларида амалга оширилиши мумкин бўлган 50 дан ортиқ инвестицион лойиҳа таклифлари юзасидан тақдимот қилинган.

Учрашув давомида Сиан шаҳрининг бир қатор компаниялари раҳбарлари билан музокаралар ўтказилган.

Хусусан, Shaanxi Roenter International Supply Chain Co., Ltd компанияси бош менежери Сара Хэ билан вилоятнинг М-37 “Самарқанд-Бухоро-Туркманбоши” автомобил йўлига параллел равишда 43 кмлик пулли йўл қуриш концепцияси муҳокама этилган. Хитой томони компания мутахассисларидан иборат бўлган ишчи гуруҳи тузилиб, Навоий вилоятига ташриф буюриши ҳамда лойиҳани амалга ошириш юзасидан техник-иқтисодий асосномаси ишлаб чиқилиши бўйича келишиб олинган.

Шунингдек, Xiangshui Changyang Chemical Co Ltd компанияси таъсисчиси билан вилоятда кимё технопарки ташкил этиш юзасидан, Dongguan Huaxin Laser Technology Co., Ltd компанияси масъуллари билан вилоятда ҳар хил қувват ва ўлчамдаги энергия тежамкор электродвигателларини ишлаб чиқариш борасида келишувларга эришилган.

Вилоят делегациясининг Хитойга ташрифи давомида Ўзбекистоннинг Пекин шаҳридаги элчихонасида қатор йирик компания вакиллари билан учрашув ўтказилиб, савдо-иқтисодий ҳамкорликни йўлга қўйиш бўйича музокаралар олиб борилган.

Қайд этилишича, сафар чоғида Хитой компаниялари билан вилоятда замонавий бизнес-марказ, хизмат кўрсатиш мажмуалари ва дам олиш масканларини қуриш, 100 гектар майдонда “Ўзбекистон – Хитой” саноат зонасини ташкил этиш, мебелчиликка ихтисослашган саноат зонасини ташкил этиш ҳамда вилоятда чармни қайта ишлаш лойиҳаларини амалга ошириш, вилоятда муқобил электр энергияси ишлаб чиқариш ва ҳудуддаги конларни ўзлаштириш, мисни қазиб олиш ва қайта ишлаш каби қатор соҳаларда келишувларга эришилган.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!