Мбаппе футбол бўйича Франция терма жамоаси сардори бўлди
Ҳужумчи Килиан Мбаппе футбол бўйича Франция терма жамоаси сардори этиб тайинланди.
Lequipe нашрининг ёзишича, Франция терма жамоаси бош мураббийи Дидье Дешам 24 ёшли футболчини сардор этиб тайинлашга қарор қилган.
Бунгача дарвозабон Уго Льорис сардорлик қилган. У 2022 йилда Қатарда бўлиб ўтган жаҳон чемпионати финалида Аргентинага мағлуб бўлганидан сўнг терма жамоадаги фаолиятини якунлаганини маълум қилди.
Килиан Мбаппе 24 март куни илк бор ўз жамоаси сардори бўлади. Шу куни Франция 2024 йилги Европа чемпионати саралашининг биринчи босқичида ўз майдонида Нидерландияни қабул қилади.
Мбаппе Франция терма жамоасида 2017 йилдан бери ўйнаб келмоқда. Бу вақт ичида у 66 учрашувда 36 та гол урди. У жамоаси билан биргаликда 2018 йилда жаҳон чемпиони бўлган, ўтган йили эса кумуш медални қўлга киритганди.
Эслатиб ўтамиз, аввалроқ футбол бўйича 2026 йилги жаҳон чемпионатини ўтказиш тартиби тасдиқлангани ҳақида хабар берган эдик.
