Макрон Алиевни Кавказдаги янги муаммолардан огоҳлантирди

Франсия президенти Эммануел Макроннинг фикрича, 1 июн куни Кишинёвда Озарбайжон президенти Илҳом Алиев билан учрашув Жанубий Кавказдаги вазият юзасидан фикр алмашишни давом эттириш ва Боку ва Ереван ўртасидаги тинчлик музокараларини қўллаб-қувватлаш имконини беради. Бу ҳақда Франсия президентининг Озарбайжон давлати раҳбарига 28 май куни Озарбайжонда нишонланадиган Мустақиллик куни муносабати билан йўллаган табрик мактубида айтилади.

Макрон мактубда Илҳом Алиев ва озарбайжон халқига “Озарбайжон миллий байрами муносабати билан энг самимий табриклар”ни етказади.

“Ўтган ўттиз йил давомида ва дипломатик муносабатлар ўрнатилганидан буён Франсия ва Озарбайжон ўртасида иқтисодий, университет ва таълим соҳаларида шерикликка асосланган мустаҳкам алоқалар ривожланди. Европа ва ташқи ишлар вазири Кетрин Колоннанинг 26-27 апрел кунлари Бокуга ташрифи икки томонлама муносабатларни ривожлантиришга бўлган умумий интилишимизни кўриш имконини берди ва бу мени қувонтирди. Бу, шунингдек, Франсиянинг Озарбайжон ва Арманистон ўртасида адолатли ва барқарор тинчлик ўрнатиш тарафдори эканини эслаш имконини берди, бу бутун минтақа барқарорлиги ва фаровонлиги учун зарур”, — деб ёзади Франсия президенти.

Эммануел Макрон “1-июн куни Кишинёвда бўлиб ўтадиган Европа сиёсий ҳамжамиятининг иккинчи саммитида сиз билан яна учрашишдан мамнун, бу бизга Кавказ ва қитъамиз олдида турган муаммолар юзасидан фикр алмашишни давом эттириш имконини беради”.

Франсия президенти “Прагадаги каби бу саммит ҳам бизга Озарбайжон ва Арманистон ўртасидаги музокараларни қўллаб-қувватлаш имкониятини беради”, деб умид билдирди.