"Маҳаллий ва хорижий рассомлар ўз асарларида Самарқанд руҳини акс эттиришмоқда" – Азиз Абдуҳакимов

Туризм ва маданий мерос вазирлиги, Маданий мерос агентлиги ҳамда Самарқанд вилояти ҳокимлиги ҳамкорлигида “Ижодимизни бирлаштиришда Самарқанд руҳи” номли тасвирий санъат кўргазмаси ташкил этилди.

Кўргазманинг очилиш маросимида нутқ сўзлаган Бош вазир ўринбосари – Туризм ва маданий мерос вазири Азиз Абдуҳакимов айни дамда ШҲТда Самарқанд руҳини ифодалаш мақсадида тизимли ишлар олиб борилаётганини таъкидлади.

“Бу ташаббуслар Ўзбекистон Президенти томонидан илгари сурилган бўлиб, ШҲТ саммити доирасида Самарқандга хориждан кўплаб рассомлар, ҳайкалтарошлар ва фотографлар таклиф этилди, – деди вазир. – Бир қанча тадбирлар, хусусан, симпозиумлар, пленерлар, марафонлар ўтказилмоқда. Бир неча кун давомида маҳаллий ва хорижий рассомлар ўз асарларида Самарқанд руҳини акс эттиришмоқда. Бу жараёнлар оммавий ахборот воситаларида ҳам кенг ёритилмоқда”.

Мазкур кўргазма ШҲТга аъзо давлатлардан келган рассомларнинг ижод намуналаридан иборат бўлди. Ижодкорларга сертификатлар топширилди ва рағбатлантирилди. Ўз навбатида хорижлик рассомлар Ўзбекистоннинг туристик салоҳиятини юқори баҳолаб, юксак эътибор, еътироф ва такрорланмас таассуротлар учун миннатдорлик билдиришди.

Маълумот учун, «Ижодий асарларимизда Самарқанд руҳи» кўргазмаси ва халқаро пленерда иштирок этиш учун Хиндистон, Қозоғистон, Хитой, Қирғизистон, Покистон, Россия Федерацияси, Тожикистон каби ШҲТга аъзо давлатларнинг иқтидорли ва нуфузли рассомлари Самарқандга таклиф этилган.

Ижодкорларнинг энг сара асарлари Самарқанд шаҳрида бўлиб ўтадиган ШҲТ саммитида намойиш этилади.

Таъкидлаш жоизки, бу каби тадбирлар Ўзбекистонда туризм, маданият ва санʼат соҳасида олиб борилаётган ислоҳотларга бериладиган баҳони янада оширади. «Ижодий асарларимизда Самарқанд руҳи» кўргазмаси эса халқаро даражадаги туризм ва санʼат соҳасидаги алоқаларни мустаҳкамлашга хизмат қилади.