Касалликларнинг 80 фоизи ифлосланган сув орқали юқади

Санитария-эпидемиология қўмитасининг маълум қилишича, сувнинг ифлосланиши сув орқали юқадиган касалликларнинг тарқалишига сабаб бўлади.

Кўпчилик, айниқса, болалар очиқ сув ҳавзаларида чўмилганда ифлосланган сувни ютиб юбориши ҳам турли юқумли ошқозон-ичак касалликларини келтириб чиқариши мумкин.

“Жаҳон Соғлиқни сақлаш ташкилотининг экспертлари дунёдаги барча касалликларнинг 80 фоизи ифлосланган сув орқали юқишини аниқлади.

Сувнинг касаллик тарқатувчи микроорганизмлар билан зарарланиши қорин тифи, дизентерия, вабо, вирусли гепатитнинг "А" тури каби бир қатор юқумли касалликларнинг тарқалишига сабаб бўлиши мумкин.

Ўткир ичак инфекциялари – патоген энтеробактериялар, шартли патоген қўзғатувчилар ва вируслар чақирадиган, ошқозон-ичак трактининг зарарланиши, интоксикация, дегидратация (сувсизланиш) ҳамда турли асоратлар билан кечадиган касалликдир.

Қорин тифи, дизентерия касалликларининг асосий белгилари тана ҳароратининг 38-39 даражагача кўтарилиши, қоринда тутиб-тутиб оғриқ пайдо бўлиши, ахлатнинг тез-тез, йиринг ва қон аралаш қаттиқ оғриқ билан келиши, дармонсизлик ва бош оғриғи ҳисобланади”, — дейилади келтирилган маълумотда.

Қўшимча қилинишича, Вирусли гепатитнинг "А" ва "Е" турлари умумий ҳолсизлик, иштаҳасизлик, кўнгил айниши, овқатлангандан сўнг қайт қилиш, шиллиқ қават ва терининг сарғайиши билан кечади.