ЖИБ Юнусобод туман суди томонидан “Анорзор” МФЙда сайёр суд мажлиси ўтказилди

Тошкент шаҳрида жиноятларни жиловлаш, жиноятчилик профилактикасини янада такомиллаштириш, одил судловни таъминлаш ва коррупциядан ҳоли ҳудудга айлантириш бўйича Йўл харитасининг ижросини таъминлаш борасида судьялар томонидан сайёр учрашувлар ва сайёр суд мажлислари ўтказиб келинади. Хусусан, куни кеча жиноят ишлари бўйича Юнусобод туман судининг судьяси Аббосхон Шамахмудов томонидан “Анорзор” маҳалла фуқаролар йиғинида ЖКнинг 105-моддаси 2-қисми “м” банди билан айблаш ҳақидаги жиноят иши сайёр суд мажлисида кўрилди.

Қурилиши битмаган бинода судланувчи ва бир фуқаро ўртасида ўзаро келишмовчилик келиб чиқади. Натижада қўлидаги совуқ қурол сифатида фойдаланиши мумкин бўлган белкуракни сопи билан фуқаронинг юз қисмига уриб тан жароҳати етказган.

Суд тиббий экспертизасининг хулосасига кўра, фуқаронинг танасида ташқи нафас олиш фаолиятини бузилиш билан кечган бурун суякларини очиқ ҳолда синиб силжиши, иккала кўз атрофи тер ости гематомалари, бурун соҳаси шилинмаси ва юмшоқ тўқималар лат ейиши каби жароҳатлар аниқланган. Мазкур тан жароҳатлар оғирлик даражасига кўра, “ўртача оғир” тан жароҳатларига киради.

Сайёр судда судланувчи айбига тўлиқ иқрорлигини билдирди.

Судланувчи Жиноят кодексининг 105-моддаси 2-қисми “м” бандида назарда тутилган жиноятни содир этганликда айбдор деб топилди ва унга шу модда билан 4 йил муддатга озодликни чеклаш жазоси тайинланди.

ЖКнинг 62-моддаси тартибида дастлабки қамоқнинг бир кунини озодликни чеклашнинг бир кунига тенглаштириб ҳисоблаб, яъни дастлабки қамоқда 28 кун бўлганини инобатга олиб, ушбу муддатни жазонинг муддатидан айириб ташлаб, узул-кесил ўташ учун 3 йил 11 ой 2 кун муддатга озодликни чеклаш жазоси тайинланди.

Озодликни чеклаш жазоси яшаш уйида кечки соат 20:00 дан эртаси куни эрталаб соат 07:00 га қадар ўташ белгиланди.

Жабрланувчига маънавий зиённи ундириш масаласи бўйича фуқаролик ишлари бўйича судга мурожаат қилиш ҳуқуқи тушунтирилди.

Ҳукмдан норози тарафлар ҳукм эълон қилинган, судланувчи ва жабрланувчи ҳукм нусхасини олган кундан бошлаб, йигирма сутка ичида Тошкент шаҳар суди жиноят ишлари бўйича судлов ҳайъатининг апелляция инстанциясига шикоят бериш ёки протест билдиришга ҳақли экани тушунтирилди.